My Marathi महाराष्ट्र माय मराठी मुख्य मुंबई

अश्विन शुद्ध प्रतिपदा शारदीय नवरात्रोत्सव च्या पहिल्या दिवशी करवीर निवासिनी अंबाबाईची नंदादेवी रूपात पूजा

अश्विन शुद्ध प्रतिपदा शारदीय नवरात्रोत्सव च्या पहिल्या दिवशी करवीर निवासिनी अंबाबाईची नंदादेवी रूपात पूजा कोल्हापूर/प्रतिनिधी : शारदीय नवरात्रोत्सवास आजपासून…

My MarathiOctober 11, 2026

My Marathi महाराष्ट्र माय मराठी मुख्य मुंबई

चुये येथून राजर्षी शाहू शेतकरी समविचारी आघाडीच्या प्रचारास प्रारंभ

गोकुळ संपवणे हाच महायुतीचा अजेंडा – आ. सतेज पाटील चुये येथे राजर्षी शाहू शेतकरी समविचारी आघाडीचा प्रचार शुभारंभ कोल्हापूर/प्रतिनिधी :…

My MarathiOctober 11, 2026October 11, 2026

My Marathi महाराष्ट्र माय मराठी मुख्य मुंबई

शक्तीपीठ महामार्गाविरोधात १३ जिल्ह्यांचा एल्गार; लातूर, हिंगोलीतून ठिणगी पडणार.

शक्तीपीठ महामार्गाविरोधात १३ जिल्ह्यांचा एल्गार; लातूर, हिंगोलीतून ठिणगी पडणार. कोल्हापूर/प्रतिनिधी : राज्य सरकारने प्रस्तावित केलेल्या शक्तीपीठ महामार्गास कडाडून विरोध करण्यासाठी…

My MarathiOctober 11, 2026October 11, 2026

My Marathi महाराष्ट्र माय मराठी मुख्य मुंबई

प्लंबिंग असोसिएशनच्या कोल्हापूर चॅप्टरतर्फे आयपीपीएल चे आयोजन

प्लंबिंग असोसिएशनच्या कोल्हापूर चॅप्टरतर्फे आयपीपीएल चे आयोजन कोल्हापूर/प्रतिनिधी : इंडियन प्लंबिंग असोसिएशन ही संघटना देशभरातील प्लंबिंग काम करणाऱ्या मंडळींच्या हितासाठी…

My MarathiOctober 5, 2026

My Marathi महाराष्ट्र माय मराठी मुख्य मुंबई

ट्युमरच्या रुग्णांना वरदान – सिद्धगिरी हॉस्पिटल पॅथॉलॉजी लॅबमध्ये अत्याधुनिक क्रायोस्टॅट मशीनचा लोकार्पण

ट्युमरच्या रुग्णांना वरदान – सिद्धगिरी हॉस्पिटल पॅथॉलॉजी लॅबमध्ये अत्याधुनिक क्रायोस्टॅट मशीनचा लोकार्पण कोल्हापूर/प्रतिनिधी : ट्युमरचे तात्काळ निदान करून रुग्णांना काही…

My MarathiOctober 5, 2026October 5, 2026

My Marathi महाराष्ट्र माय मराठी मुख्य मुंबई

डी वाय पाटील पॉलिटेक्निकच्या विद्यार्थ्यांनी सुरू केला स्टार्टअप

डी वाय पाटील पॉलिटेक्निकच्या विद्यार्थ्यांनी सुरू केला स्टार्टअप कोल्हापूर/प्रतिनिधी : शिक्षण घेत असतानाच स्वतःच्या कल्पनेला व्यावसायिक स्वरूप देत उद्योजकतेची नवी…

My MarathiSeptember 30, 2026

My Marathi महाराष्ट्र माय मराठी मुख्य मुंबई

असोसिएशन ऑफ पॅथॉलॉजिस्ट महाराष्ट्रचे ४७ वे वार्षिक ‘मॅपकॉन’ अधिवेशन २ ऑक्टोबरला कोल्हापुरात

असोसिएशन ऑफ पॅथॉलॉजिस्ट महाराष्ट्रचे ४७ वे वार्षिक ‘मॅपकॉन’ अधिवेशन २ ऑक्टोबरला कोल्हापुरात कोल्हापूर/प्रतिनिधी : इंडियन असोसिएशन ऑफ पॅथॉलॉजिस्ट अँड मायक्रोबायोलॉजिस्ट…

My MarathiSeptember 30, 2026September 30, 2026

My Marathi महाराष्ट्र माय मराठी मुख्य मुंबई

लक्षतीर्थ वसाहत येथील गवळी कुटुंबीयांचा गणेश ठरत आहे अनेक सेलिब्रिटी आणि गवळी कुटुंबियांसाठी महत्वपूर्

लक्षतीर्थ वसाहत येथील गवळी कुटुंबीयांचा गणेश ठरत आहे अनेक सेलिब्रिटी आणि गवळी कुटुंबियांसाठी महत्वपूर् कोल्हापूर/प्रतिनिधी : अतिशय प्रतिकूल परिस्थितीत…

My MarathiSeptember 15, 2026September 15, 2026

My Marathi महाराष्ट्र माय मराठी मुख्य मुंबई

भारतातील सर्वोच्च न्यूरो संस्था SCTIMST, त्रिवेंद्रम कडून न्यूरोसर्जन डॉ. शिवशंकर मारजक्के यांना सर्वोच्च “अवॉर्ड ऑफ एक्सलन्स” प्रदान

भारतातील सर्वोच्च न्यूरो संस्था SCTIMST, त्रिवेंद्रम कडून न्यूरोसर्जन डॉ. शिवशंकर मारजक्के यांना सर्वोच्च “अवॉर्ड ऑफ एक्सलन्स” प्रदान श्री चित्रा संस्थेच्या…

My MarathiSeptember 15, 2026September 15, 2026

My Marathi महाराष्ट्र माय मराठी मुख्य मुंबई

सिद्धगिरीच्या पशुवैद्यक महाविद्यालयाचा लोकार्पण सोहळा पंकज मुंडे यांच्या हस्ते येत्या गुरुवारी होणार

सिद्धगिरीच्या पशुवैद्यक महाविद्यालयाचा लोकार्पण सोहळा पंकज मुंडे यांच्या हस्ते येत्या गुरुवारी होणार कोल्हापूर/प्रतिनिधी : श्री सिद्धगिरी मठ संस्थान तर्फे स्थापन…

My MarathiAugust 31, 2026

अश्विन शुद्ध प्रतिपदा शारदीय नवरात्रोत्सव च्या पहिल्या दिवशी करवीर निवासिनी अंबाबाईची नंदादेवी रूपात पूजा

कोल्हापूर/प्रतिनिधी : शारदीय नवरात्रोत्सवास आजपासून प्रारंभ झाला कोल्हापूरच्या करवीर निवासिनी महालक्ष्मी देवीचा नवरात्रोत्सव सुरू झाला असून लाखो भाविकांचे श्रद्धास्थान असलेल्या या अंबाबाई देवीच्या नऊ दिवस वेगवेगळ्या पूजा बांधल्या जातात.शारदीय नवरात्र महोत्सव श्री शके १९४८ ची आज प्रतिपदा तिथी आज नवरात्र महोत्सवाच्या पहिल्या दिवशी करवीर निवासिनी महालक्ष्मी अर्थात आई अंबाबाई भगवान श्रीकृष्णांच्या बरोबर अवतार धारण केलेल्या नंदकन्या नंदादेवी या रूपात सजली होती. दुर्गा सप्तशतीच्या अकरावा अध्यात देवांना शुंभनिशुंभाच्या वधा नंतर वर देताना देवी सांगते की पुन्हा वैवस्वत मन्वंतराच्या २८ व्या द्वापार युगात शुंभ आणि निशुंभ पुन्हा जन्माला येतील तेव्हा तुम्ही नंद गोपाच्या घरी जन्म घेऊन लक्ष्मी श्री इंदिरा कमला या नावाने प्रसिद्ध होईन.
त्याप्रमाणे भगवान श्रीकृष्णांनी देवकीच्या उदरी जन्म घेतल्यानंतर माता योगमाया यशोदेच्या पोटी जन्माला आली. भगवान श्रीकृष्णांना गोकुळात ठेवल्यानंतर ही कन्या घेऊन वसुदेव कंसाच्या कारागारात आले तिथून कंसाच्या हातून निसटून ही कन्या विंध्याचल पर्वतावर जाऊन विराजमान झाली म्हणून हिला विंध्यवासिनी असेही म्हणतात मध्य प्रदेशातील देवीचे हे स्थान प्रसिद्ध आहे महाराष्ट्रात अनेक ठिकाणी विंध्यवासिनीची स्थाने आहेत. पाली खंडोबाच्या लग्नात करवली ची भूमिका बजावणारी ही इंजाई अनेकांची कुलस्वामिनी देखील आहे. सुवर्ण वर्णाची ही देवी वस्त्रे देखील तशीच सोन्याच्या रंगाची घालते हातामध्ये कमळ पाश अंकुश आणि शंख ही चार आयुधे धारण करणारी ही देवी सोन्याच्या रंगाच्या कमळावर विराजमान असते.आज करवीर निवासिनी श्री महालक्ष्मी अर्थात आई अंबाबाई याच रूपात विराजमान आहे.
सोन्याप्रमाणे अंगकांती असलेली, सोन्याप्रमाणे सुंदर वस्त्र धारण केलेली, सुवर्णवर्णाची आणि उत्तम सुवर्णालंकारांनी अलंकृत असलेली देवी आहे.
कमळ, अंकुश, पाश आणि शंख धारण करणारी, चतुर्भुजा, सोन्याच्या कमळावर विराजमान असलेली इंदिरा, कमला, लक्ष्मी, श्री या नावांनी ओळखली जाणारी देवी अशी तिची महती वर्णन केली आहे.
नंदा देवीचे स्वरूप वर्णन
देवीमाहात्म्य अंतर्गत मूर्तीरहस्यामध्ये नंदा देवीचे स्वरूप वर्णन केलेले आहे. त्यानुसार नंदा देवी ही सोन्यासारखी कांती असलेली, सुवर्णमय वस्त्रे व आभूषणे धारण केलेली आहे. ती चतुर्भुज असून तिच्या चार हातांत कमळ, अंकुश, पाश आणि शंख आहेत.
या देवीची नंदजा, कमला, इंदिरा, श्री आणि लक्ष्मी अशी इतर नावे आहेत. मूर्तीरहस्यानुसार या देवीची स्तुती, पूजन व ध्यान केल्याने तीनही लोक वश होतात.
ही पूजा अजिंक्य मुनिश्वर,
वेदांग मुनिश्वर,सोहम दिलीप मुनिश्वर,रवी माइणकर
यांनी बांधली. आज पहिल्याच दिवशी महालक्ष्मीच्या दर्शनासाठी भाविकांनी मंदिरात प्रचंड गर्दी केली होती.संस्कृत मध्ये या पूजेचा अर्थ कनकोत्तम कान्ति: सा सुकान्तिकनकाम्बरा ।
देवी कनकवर्णाभा कनकोत्तमभूषणा ॥
कमलाङ्कुशपाशाब्जै: रलंकृता चतुर्भुजा ।
इन्दिरा कमला लक्ष्मी: सा श्रीरुक्मांबुजासना ॥ असा होतो.

चुये येथून राजर्षी शाहू शेतकरी समविचारी आघाडीच्या प्रचारास प्रारंभ

गोकुळ संपवणे हाच महायुतीचा अजेंडा – आ. सतेज पाटील
चुये येथे राजर्षी शाहू शेतकरी समविचारी आघाडीचा प्रचार शुभारंभ

कोल्हापूर/प्रतिनिधी : महायुतीतील तिन्ही घटक पक्ष सहा महिने एकमेकांशी भांडत राहिले. त्यांनी प्राथमिक दूध संस्थांना अक्षरशः वेठीस धरले, नुरा कुस्ती खेळून फक्त खडखडी केली आणि आता निवडणुका जाहीर झाल्यावर एकमेकांच्या गळ्यात गळे घालत आहेत. सर्व निर्णय मुंबईत घेणाऱ्या महायुतीचा अजेंडा गोकुळ संपवणे हाच असल्याचा घणाघात आमदार सतेज पाटील यांनी केला. गोकुळ दूध संघाच्या पंचवार्षिक निवडणुकीसाठी चुये येथे आयोजित ‘राजर्षी शाहू शेतकरी समविचारी आघाडी’च्या प्रचार शुभारंभ प्रसंगी ते बोलत होते. गोकुळचे संस्थापक स्वर्गीय आनंदराव पाटील चुयेकर यांच्या समाधीस्थळी अभिवादन करून प्रचार शुभारंभ करण्यात आला. यावेळी माजी खासदार राजू शेट्टी, शिवसेना सहसंपर्क प्रमुख विजय देवणे, माजी आमदार बजरंग देसाई, सत्यजित पाटील- सरूडकर राजीव आवळे, ऋतुराज पाटील, राजूबाबा आवळे, गोकुळचे माजी अध्यक्ष रणजीत पाटील, यांच्यासह मान्यवर व सर्व उमेदवार व्यासपीठावर उपस्थित होते.
आमदार सतेज पाटील म्हणाले, सत्तेसाठी एकत्र आलेल्या मंडळींचा गेल्या सहा महिन्यापासून चालेला तमाशा जिल्ह्याने पाहिला आहे. आमची लढाई साडेपाच लाख दूध उत्पादकांच्या संसारासाठी आणि गोकुळ टिकवण्यासाठी आहे. कोल्हापूर जिल्ह्याचे अर्थकारण जिवंत ठेवायचे असेल, तर गोकुळ टिकवणे अत्यंत गरजेचे आहे. गोकुळ शेतकऱ्याच्या मालकीचा रहावा यासाठी समविचारी आघाडीच्या ‘शिट्टी’ या चिन्हावर उभे असलेल्या सर्व २५ उमेदवारांना विजयी करा आणि विकासाची शिट्टी वाजवा. माजी खासदार राजू शेट्टी म्हणाले, महायुतीचे नेते प्रत्येक निर्णयासाठी मुंबईवर अवलंबून आहेत. गोकुळला परावलंबी करण्याचा त्यांचा प्रयत्न आहे. जिल्ह्यातून जाणारा शक्तीपीठ नको म्हणण्याची हिंमत दाखवू तुम्ही शकत नाही, त्यामुळे गोकुळ अमुलच्या घशात घालण्याविरुद्ध तुम्ही तोंड उघडू शकाल का ? असा सवाल त्यांनी महायुतीच्या नेत्यांना केला. महानंद बंद पाडल्यानंतर आता मुंबईतील गोकुळचे मार्केट अमूलच्या घशात घालण्याचा डाव असल्याचा आरोप त्यांनी यावेळी केला.
शिवसेना सहसंपर्क प्रमुख विजय देवणे म्हणाले, सतेज पाटील यांच्यासारख्या खमक्या नेतृत्वाची गोकुळला गरज आहे. एका नेत्याविरोधात जिल्ह्यातील महायुतीचे झाडून सारे नेते उतरले आहे. या सर्वांना कोल्हापूरचा स्वाभिमान दाखवून देण्याची गरज आहे.माजी आमदार ऋतुराज पाटील म्हणाले, या निवडणुकीत जनमत हे समविचारी आघाडीच्या बाजूने आहे. गोकुळच्या चाव्या कोल्हापुरातच ठेवायच्या कि मुंबई, दिल्लीत याचा निर्णय स्वभिमानी शेतकऱ्यांनी घ्यायचा आहे.
माजी आमदार सत्यजित पाटील म्हणाले, महायुती सरकारने प्रशासक, १४०० संस्था अपात्र अशा विविध मार्गांनी गोकुळ मोडीत काढण्याचा प्रयत्न केले. गोकुळ वाचवण्याची ही शेवटची संधी असून समविचारी आघडीच्या सर्व उमेदवारांना विजयी करा.माजी आमदार राजूबाबा आवळे म्हणाले, ही लढाई मतदानाचा आपला अधिकार अबाधित ठेवण्यासाठी आहे.माजी आमदार राजीव आवळे म्हणाले, गोकुळच्या या निवडणुकीत कोणी भावासाठी, कोणी बायकोसाठी, कोणी मुलासाठी लढत आहेत. मात्र आ. सतेज पाटील शेतकऱ्याच्या हितासाठी लढत आहेत. मागीलवेळी शशिकांत पाटील चुयेकर याना चेअरमन करण्याची वेळ आली तेव्हा काही नेत्यांनी ‘वासरू संगोपन’ योजना आणल्याची टीका त्यांनी केली.
शशिकांत पाटील चुयेकर यांनी प्रास्ताविक केले. ते म्हणाले, स्वर्गीय आनंदराव चुयेकर यानी तन,मन, धन अर्पण करून गोकुळची उभारणी केली. त्याकाळी माझ्या आजीचे सोने गहाण ठेवून त्यांनी गोकुळसाठी पैसे उभे केले. त्यांच्या शेवटच्या दिवसात भेटायला येणाऱ्यानाही गोकुळ शेतकऱ्यांच्या मालकीचा ठेवा असे आवाहन चुयेकर साहेब करत होते. त्यांची ही इच्छा पूर्ण करण्याची जबाबदारी आता आपल्या सर्वांची आहे.

चौकट

गोकुळ संपवण्याच्या महायुतीचा डाव

आमदार सतेज पाटील यांनी सांगितले कि, गुजरातमधील अमूल डेअरी परिसरात सरदार वल्लभभाई पटेल सहकारी डेअरी फेडरेशन हि मल्टीस्टेट संघटना स्थापन केली आहे. गोकुळला या फेडरेशनशी जोडून गोकुळचे अस्तित्व संपविण्याचा महायुतीचा डाव आहे. त्यासाठीच आतापासूनच गोकुळशी संबंधित सर्व निर्णय हे मुंबईतून घेतले जात आहेत.

खासदारांचे कुरघोडीचे राजकारण

राज्यसभा खासदार हे शशिकांत पाटील यांना चेअरमन का केले नाही असे विचारतात. प्रत्यक्षात शेवटच्या चेअरमन निवडीअगोदर या लोकानीच मुंबईत कुरघोड्या करून त्यांना चेअरमन पदापासून रोखले. हे खासदार बोलतात एक आणि करतात दुसरेच अशी टीका सुयोग वाडकर यांनी केली.

बावड्याचा हात निष्ठेचा

बावड्याचा हात निष्ठेचा आहे. त्यामुळे तुम्हाला तो हाती घ्यायला जमला नसावा. तर तुमचा हात मोठा म्हणूनच ईडी सीबीआयवाले मागे लावले. विचारधारेमुळे नाही तर ईडीमुळे ते एकत्र आले आहेत अशी टीका राजीव आवळे यांनी केली.यावेळी गटनेते एकनाथ पाटील, राजू लाटकर, सत्यजित जाधव, हिंदुराव चौगले, शामराव देसाई, पी. डी. धुंदरे, ए. डी. पाटील, एम. आर. पाटील, सदाशिव चरापले, श्रीमती उदयानी साळुंखे, सौ. स्मिता गवळी, उमेश भोईटे, भिकाजी एकल, रणजीत पाटील, विश्वनाथ पाटील, रामराजे कुपेकर, सुभाष वाडकर, एस. के. पाटील, बबन रानगे, शशिकांत खवरे, कॉ. सम्राट मोरे, गणपतराव डोंगरे, निवास पाटील, भगवानराव जाधव, संभाजीराव देसाई, अमर पाटील- शिंगणापूरकर, प्रकाश पाटील, मोहन धुंदरे, दिग्विजय कुराडे, प्रशांत देसाई, पांडुरंग भांदिगरे, जीवन पाटील, श्रीपती पाटील, एस. बी. पाटील, आर. एस. कांबळे, डी.एस. पाटील, विश्वास दिंडोर्ले, सखाराम चव्हाण, संग्राम पाटील, विश्वनाथ पाटील, सागर धुंदरे, संभाजीराव पाटणकर, सभापती सागर पाटील, सभापती छाया देसाई, दत्तात्रय वारके, निवास पाटील, मधुकर रामाणे, डॉ. के. एन. पाटील, बाजीराव पाटील, पांडुरंग पाटील, कृष्णा पाटील, सागर कोंडेकर, एकनाथ पाटील, विष्णुपंत एकशिंगे, हिंदुराव पाटील यांच्यासह समविचारी आघाडीचे सर्व उमेदवार, जिल्हाभरातील ठरावधारक आणि दूध उत्पादक उपस्थित होते.

शक्तीपीठ महामार्गाविरोधात १३ जिल्ह्यांचा एल्गार; लातूर, हिंगोलीतून ठिणगी पडणार.

शक्तीपीठ महामार्गाविरोधात १३ जिल्ह्यांचा एल्गार; लातूर, हिंगोलीतून ठिणगी पडणार.

कोल्हापूर/प्रतिनिधी : राज्य सरकारने प्रस्तावित केलेल्या शक्तीपीठ महामार्गास कडाडून विरोध करण्यासाठी अखेर १३ जिल्ह्यांतील ‘शक्तीपीठ विरोधी संघर्ष समिती’च्या प्रमुख पदाधिकाऱ्यांची महत्त्वपूर्ण बैठक कोल्हापूर येथे पार पडली. काँग्रेसचे आमदार सतेज पाटील यांच्या अजिंक्यतारा कार्यालयात पार पडलेल्या या उच्चस्तरीय बैठकीला स्वाभिमानी शेतकरी संघटनेचे नेते व माजी खासदार राजू शेट्टी, आमदार जयंत पाटील आणि आमदार सतेज पाटील प्रामुख्याने उपस्थित होते. या बैठकीत सरकारच्या दडपशाहीविरोधात आरपारची लढाई लढण्याचा निर्धार करण्यात आला असून, आंदोलनाची व्याप्ती आता मराठवाडा आणि विदर्भात वाढवण्याचा निर्णय घेण्यात आला आहे.
यावेळी बोलताना राजू शेट्टी म्हणाले कि राज्य सरकार सर्व कायदे धाब्यावर बसवून, केवळ पोलिस बळाचा आणि प्रशासकीय अधिकाऱ्यांचा वापर करून शक्तीपीठ महामार्ग शेतकऱ्यांच्या गळ्याखाली रेटण्याचा प्रयत्न करत आहे. “शेतकऱ्यांचा या प्रकल्पाला सुरुवातीपासूनच कडाडून विरोध आहे. तरीही कोणतीही कायदेशीर प्रक्रिया पूर्ण न करता, जबरदस्तीने जमिनीची मोजणी आणि संपादन करण्याचे बेकायदेशीर प्रयत्न सरकारकडून सुरू आहेत,” असा संतप्त आरोप यावेळी शेट्टी यांनी केला.
यावेळी बोलताना जयंत पाटील म्हणाले कि यापुढे ज्या ज्या गावांमध्ये प्रशासन जमिनीची मोजणी करण्यासाठी येईल, त्या सर्व गावांमध्ये संघर्ष समितीचे प्रमुख पदाधिकारी स्वतः मोजणीच्या ठिकाणी उपस्थित राहून ते केवळ शेतकऱ्यांना कायदेशीर व धोरणात्मक मार्गदर्शन करणार नाहीत, तर वेळप्रसंगी प्रशासनाशी व पोलिसांशी दोन हात करून असहकार्याची भूमिका घ्यावा असा थेट इशारा दिला आहे. कोणत्याही परिस्थितीत शेतकऱ्यांच्या संमतीशिवाय एक इंचही जमीन मोजू दिली जाणार नाही, यावर सर्व नेत्यांचे एकमत झाले.
आमदार सतेज पाटील म्हणाले कि पश्चिम महाराष्ट्रात सुरू असलेला हा लढा आता संपूर्ण राज्यभर पसरवण्याची तयारी पूर्ण झाली आहे. पुढील काही दिवसांत मराठवाडा आणि विदर्भात प्रचंड मोठे जनआंदोलन उभारण्यात येणार आहे. याची सुरुवात लातूर आणि हिंगोली या जिल्ह्यांतून होणार असून, येथे शक्तीपीठ महामार्गाविरोधात भव्य ‘एल्गार मेळावे’ आणि आंदोलने आयोजित केली जाणार आहेत. या मेळाव्यांच्या माध्यमातून मराठवाडा व विदर्भातील हजारो शेतकऱ्यांना एकत्र करून सरकारला हा प्रकल्प रद्द करण्यास भाग पाडले जाईल, असा विश्वास सतेज पाटील यांनी व्यक्त केला.या निर्णयामुळे आगामी काळात शक्तीपीठ महामार्गाचा वाद चिघळण्याची आणि सरकार विरुद्ध शेतकरी असा तीव्र संघर्ष पाहायला मिळण्याची चिन्हे आहेत.
या बैठकीस कॅाम्रेड धनाजी गुरव , कॅा. गिरीश फोंडे , बी जी पाटील काका , रणजित पाटील , प्रकाश पाटील , के के पाटील यांचेसह १३ जिल्ह्यांतील शेतकरी प्रतिनिधी, संघर्ष समितीचे समन्वयक आणि मोठ्या संख्येने प्रमुख पदाधिकारी उपस्थित होते.

प्लंबिंग असोसिएशनच्या कोल्हापूर चॅप्टरतर्फे आयपीपीएल चे आयोजन

प्लंबिंग असोसिएशनच्या कोल्हापूर चॅप्टरतर्फे आयपीपीएल चे आयोजन

कोल्हापूर/प्रतिनिधी : इंडियन प्लंबिंग असोसिएशन ही संघटना देशभरातील प्लंबिंग काम करणाऱ्या मंडळींच्या हितासाठी स्थापन झालेली संघटना आहे . प्लंबिंग क्षेत्रातील प्रश्न सोडवणे , समाजात प्लंबिंगचे महत्व रोजगाराच्या संधी , नवनवीन संकल्पना याबाबत ही संघटना कार्यरत आहे . संघटनेच्या कोल्हापूर चॅप्टर मध्ये (कोल्हापूर ,सांगली, सातारा ,रत्नागिरी , सिंधुदुर्ग ) सर्वसामान्य प्लंबिंग काम करणाऱ्यांपासून ते प्लंबिंग व्यवसायिक , दुकानदार , यांचा समावेश आहे . कोल्हापूर चॅप्टरतर्फे प्रथमच आयपीपीएल (इंडियन प्लंबिंग प्रोफेशनल लीग ) स्पर्धेचे आयोजन केले आहे . या अंतर्गत सहभाग घेणाऱ्या इच्छुकांना ऑक्टोबर महिन्यातील दि . ३ , दि . १० , दि . १७ , या प्रमुख दिवसांमध्ये रोटरी समाज केंद्र येथे ट्रेनिंग देण्यात येणार आहे . यात थेरॉटिकल प्रेझेंटेशन , पॉवर पॉइंट प्रेझेंटेशन , प्रायोजक कंपन्यांकडून तांत्रिक माहिती आदी गोष्टींचा समावेश असेल. तर दि. २४ रोजी लेखी (थेरॉटिकल ) परीक्षा घेतली जाणार आहे .हा ट्रेनिंग प्रोग्राम २ जण एकत्रितपणे करू शकतात. म्हणजेच यासाठी २ जणांची एक टीम मानली जाते. या ट्रेनिंग आणि परीक्षेमध्ये सहभागी झालेल्यांना प्रमाणपत्र दिले जाणार आहे. तसेच यातील गुणवत्ता मिळवलेल्या उमेदवारांना चेन्नई येथे होणाऱ्या अंतिम फेरीसाठीही पाठवले जाणार आहे. प्लंबिंग हे क्षेत्र तसे नवीन नाही. पण यामध्येही रोजगाराच्या मोठ्या संधी नवोदिकांना उपलब्ध होऊ शकतात.इच्छुक उमेदवारांनी मधु किरण न्यू महाद्वार रोड येथे संपर्क साधावा यासाठी संघटनेचे राष्ट्रीय अध्यक्ष गुरमित सिंग अरोरा ,सचिव मनिष जैन यांचे मार्गदर्शन लाभले आहे. तर संपूर्ण प्रोग्रामचे संयोजन कोल्हापूर चॅप्टरचे रवि साळुंखे , किरण जोशी, देवांग शेठ ,गिरीश कुलकर्णी, सुशांत नांगरे , शीतल पाटील यांनी केले आहे. इच्छुकांनी संघटनेशी संपर्क करावा असे आवाहन करण्यात आले आहे.

ट्युमरच्या रुग्णांना वरदान – सिद्धगिरी हॉस्पिटल पॅथॉलॉजी लॅबमध्ये अत्याधुनिक क्रायोस्टॅट मशीनचा लोकार्पण

ट्युमरच्या रुग्णांना वरदान – सिद्धगिरी हॉस्पिटल पॅथॉलॉजी लॅबमध्ये अत्याधुनिक क्रायोस्टॅट मशीनचा लोकार्पण

कोल्हापूर/प्रतिनिधी : ट्युमरचे तात्काळ निदान करून रुग्णांना काही क्षणात रिपोर्ट देणाऱ्या अत्याधुनिक क्रायोस्टॅट मशीनचा लोकार्पण सोहळा सिद्धगिरी हॉस्पिटल आणि रिसर्च सेंटर, कणेरी येथे निमान्सच्या (NIMHANS) न्यूरोपॅथॉलॉजी विभागाच्या विभागप्रमुख आणि जगविख्यात शास्त्रज्ञ डॉ. अनिता महादेवन यांच्या हस्ते संपन्न झाला. यावेळी परमपूज्य काडसिद्धेश्वर स्वामीजी, पॅथॉलॉजी प्रमुख डॉ.प्रतिमा मरजक्के प्रमुख उपस्थित होते.शस्त्रक्रियेदरम्यान काढलेला ट्युमर कर्करोगाचा आहे की नाही किंवा कर्करोगाचा संपूर्ण भाग काढला गेला आहे की नाही, या महत्त्वाच्या प्रश्नाला डॉक्टराना (शल्यचिकित्सकांना) अनेकदा सामोरे जावे लागते. असा काढलेला ट्युमर सर्वसाधारण पॅथॉलॉजी प्रक्रियेला अहवाल (रिपोर्ट) तयार करण्यासाठी ३ ते ४ दिवस लागू शकतात, तर क्रायोस्टॅट मशीन वापरून फ्रोजन सेक्शन तंत्रज्ञानाद्वारे अंदाजे १०-१५ मिनिटांत आवश्यक माहिती मिळते. त्यामुळे शस्त्रक्रिया करत असतानाच डॉक्टर रुग्णावर आवश्यक ते पुढील उपचार तात्काळ करू शकतात व रुग्णाला दिलासा मिळू शकतो. यामुळे ट्यूमरचे स्वरूप आणि सर्जिकल मार्जिनबद्दल त्वरित निर्णय घेण्यास मदत होते. म्हणूनच क्रायोस्टॅटला खऱ्या अर्थाने “सर्जिकल पॅथॉलॉजीसाठीचे आपत्कालीन साधन” म्हटले जाऊ शकते.
मेंदूचे ट्यूमर ३०० पेक्षा जास्त प्रकारचे आहेत, ते अनेकदा एकमेकांसारखेच दिसतात. केवळ एच अँड ई (H&E) स्टेनिंगद्वारे ट्यूमरचे अस्तित्व कळू शकते, तर आयएचसी (IHC) त्याचा प्रकार, ग्रेड आणि उपचारासंबंधी महत्त्वाची माहिती अधिक अचूकपणे निश्चित करण्यास मदत करते. इम्युनोहिस्टोकेमिस्ट्री किंवा आयएचसी (IHC) न्यूरोपॅथॉलॉजीमध्येही महत्त्वाची भूमिका बजावते. डॉ. अनिता महादेवन या बंगळूर येथील नॅशनल इन्स्टिट्यूट ऑफ मेंटल हेल्थ अँड न्यूरोसायन्सेस (NIMHANS) मध्ये न्यूरोपॅथॉलॉजी विभागाच्या विभागप्रमुख आणि प्राध्यापिका म्हणून कार्यरत आहेत. वैद्यकशास्त्र आणि संशोधन क्षेत्रात त्यांचा व्यापक अनुभव आणि महत्वपूर्ण योगदान आहे. त्यांच्या विशेष प्राविण्याच्या प्रमुख क्षेत्रांमध्ये न्यूरोपॅथॉलॉजी, न्यूरोइन्फेक्शन, अपस्माराशी संबंधित न्यूरोपॅथॉलॉजी, पेरिफेरल न्यूरोपॅथी आणि मेंदूच्या ऊतींवरील संशोधन व ब्रेन बँकिंग यांसारख्या महत्त्वाच्या विषयांचा समावेश आहे. त्यांच्या हस्ते ह्या मशीनचा लोकार्पण सोहळा विशेष महत्वपूर्ण आहे.
डॉ. शिवशंकर मरजक्के ह्यांनी सिद्धगिरी हॉस्पिटल येथील न्युरो विभागाला जागतिक स्तरावर नेले आहे, ह्या मशीनमुळे अशा स्वरूपाच्या मेंदूच्या शस्त्रक्रियेला अधिक स्पष्टता येणार आहे. ह्या अत्याधुनिक मशीन ट्रस्ट श्रेणीत कोल्हापुरात पहिल्यांदा सिद्धगिरी हॉस्पिटलमध्ये कार्यान्वित होत आहे. अशा टेस्ट करिता सर्वसाधारणपणे १५ हजारांचा खर्च येतो पण ह्याच तपासणी सिद्धगिरी हॉस्पिटल येथे ‘ना नफा ना तोटा’ या तत्वावर केवळ ५ ते ६ हजारात होणार असून गरजू रुग्णांनी त्याचा लाभ घ्यावा असे आवाहन पॅथॉलॉजी प्रमुख डॉ.प्रतिमा मरजक्के यांनी यावेळी केले. या लोकार्पण सोहळ्याला सिद्धगिरी हॉस्पिटलचे वैद्यकीय अधीक्षक डॉ.प्रकश भरमगौडर, डॉ. अंकुश पार्टे, डॉ. तनिष पाटील, डॉ. प्रशांत नाडेकर, डॉ. शंतनू पालकर, डॉ. सचिन पाटील, डॉ. विशाल खलाटे यांच्यासह कर्मचारी व नागरिक उपस्थित होते.

डी वाय पाटील पॉलिटेक्निकच्या विद्यार्थ्यांनी सुरू केला स्टार्टअप

डी वाय पाटील पॉलिटेक्निकच्या विद्यार्थ्यांनी सुरू केला स्टार्टअप

कोल्हापूर/प्रतिनिधी : शिक्षण घेत असतानाच स्वतःच्या कल्पनेला व्यावसायिक स्वरूप देत उद्योजकतेची नवी वाट चोखाळणाऱ्या कसबा बावडा येथील डॉ. डी. वाय. पाटील पॉलिटेक्निकच्या दोन विद्यार्थ्यांनी स्वत:चा स्टार्टअप सुरु केला आहे. संगणक विज्ञान व अभियांत्रिकीच्या तृतीय वर्षात शिकणाऱ्या निखिल चव्हाण आणि सिद्धेश धुंदरे यांच्या ‘श्रावणी नेक्सटेक’ या आयटी सेवा पुरविणाऱ्या स्टार्टअपला ग्राहकांकडून उत्स्फूर्त प्रतिसाद मिळत आहे.डी. वाय. पाटील पॉलिटेक्निककडून नेहमीच विद्यार्थ्यांना नवसंकल्पना, संशोधन आणि उद्योजकतेसाठी प्रोत्साहन दिले जाते. त्यातूनच निखिल आणि सिद्धेश यांना स्टार्टअपची संकल्पना सुचली. वडिलांच्या मित्रांना जाणवणाऱ्या विविध आयटीविषयक गरजा लक्षात घेऊन त्यांनी त्यावर तंत्रज्ञानाधारित उपाय विकसित करण्यास सुरुवात केली. संकल्पनेला प्रत्यक्ष व्यवसायाचे रूप देत त्यांनी ‘श्रावणी नेक्सटेक’ची सुरुवात केली असून, आता त्यांना विविध प्रकल्पांची कामेही मिळू लागली आहेत.
‘श्रावणी’ या संस्कृत शब्दाचा अर्थ ‘ऐकणे आणि शिकणे’ असा होतो. ग्राहकांच्या गरजा समजून घेऊन त्यानुसार तंत्रज्ञानाधारित सेवा देणे, हे या स्टार्टअपचे वैशिष्ट्य आहे. वेबसाईट डिझाइन, डिजिटल मार्केटिंग, ॲप्लिकेशन डेव्हलपमेंट, सॉफ्टवेअर डेव्हलपमेंट आणि कृत्रिम बुद्धिमत्ता आधारित उपाययोजना अशा विविध सेवा येथे दिल्या जातात. या कामासाठी विविध २० हून अधिक तंत्रज्ञानांचा वापर केला जात आहे.प्राचार्य डॉ. महादेव नरके म्हणाले, डी. वाय. पाटील पॉलिटेक्निकमध्ये विद्यार्थ्यांनी घेतलेल्या ज्ञानाचा प्रत्यक्ष उपयोग करून विद्यार्थी दशेतच स्टार्टअप सुरू करणे ही निश्चितच कौतुकास्पद बाब आहे. विद्यार्थ्यांच्या कल्पनांना योग्य मार्गदर्शन आणि संधी मिळाल्यास ते भविष्यात सक्षम उद्योजक बनू शकतात.
भविष्यात आधुनिक तंत्रज्ञानाचा प्रभावी वापर करून समाजोपयोगी सेवा आणि नाविन्यपूर्ण उपाय विकसित करण्यावर भर देणार असल्याचे निखिल चव्हाण व सिद्धेश धुंदरे यांनी सांगितले.
या विद्यार्थ्यांना प्राचार्य डॉ. महादेव नरके, संगणक विभागप्रमुख डॉ. पी. के. शिंदे, प्रा. शीतल साळोखे व शिक्षकांचे मार्गदर्शन व सहकार्यन लाभले.
संस्थेचे अध्यक्ष डॉ. संजय डी. पाटील, उपाध्यक्ष आमदार सतेज डी. पाटील, विश्वस्त ऋतुराज पाटील, विश्वस्त पृथ्वीराज पाटील, कार्यकारी संचालक डॉ. ए. के. गुप्ता, प्राचार्य डॉ. महादेव नरके यांनी निखिल व सिद्धेश यांचे अभिनंदन करून शुभेच्छा दिल्या.

असोसिएशन ऑफ पॅथॉलॉजिस्ट महाराष्ट्रचे ४७ वे वार्षिक ‘मॅपकॉन’ अधिवेशन २ ऑक्टोबरला कोल्हापुरात

असोसिएशन ऑफ पॅथॉलॉजिस्ट महाराष्ट्रचे ४७ वे वार्षिक ‘मॅपकॉन’ अधिवेशन २ ऑक्टोबरला कोल्हापुरात

कोल्हापूर/प्रतिनिधी : इंडियन असोसिएशन ऑफ पॅथॉलॉजिस्ट अँड मायक्रोबायोलॉजिस्ट महाराष्ट्र चॅप्टरचे ४७ वे वार्षिक अधिवेशन ‘मॅपकॉन २०२६’ यावर्षी कोल्हापूरमध्ये होता आहे. डी. वाय. पाटील मेडिकल कॉलेजच्या पॅथॉलॉजी विभागातर्फे या २ ते ४ ऑक्टोबर या कालावधीत हॉटेल सयाजी येथे या अधिवेशनाचे आयोजन करण्यात आल्याची माहिती पॅथॉलॉजी विभागाप्रमुख आणि संयोजन समितीच्या अध्यक्ष डॉ सुचिता देशमुख, सचिव डॉ. आर. एस. पाटील व खजिनदार डॉ. आर. एम. शिंदे यांनी पत्रकार परिषदेत दिली.
‘नेक्सट जनरेशन पॅथॉलॉजी’ या थीमवर या निमित्ताने प्रथमच ‘हरित परिषदे’चे आयोजन करण्यात आले आहे. यामध्ये मॉलिक्युलर डायग्नोस्टिक्स, डिजिटल पॅथॉलॉजी, आर्टिफिशियल इंटेलिजन्स (AI) आणि प्रिसिजन मेडिसिन या भविष्यातील अत्याधुनिक तंत्रज्ञानावर चर्चा होणार असल्याचे त्यांनी सांगितले.
शुक्रवार दि. २ ऑक्टोबर रोजी डी. वाय. पाटील अभिमत विद्यापीठाचे कुलपती डॉ. संजय डी. पाटील यांच्याहस्ते परिषदेचे उद्घाटन होणार आहे. यावेळी डी. वाय. पाटील ग्रुपचे विश्वस्त ऋतुराज पाटील, विश्वस्त पृथ्वीराज पाटील, इंडियन असोसिएशन ऑफ पॅथॉलॉजिस्ट अँड मायक्रोबायोलॉजिस्ट महाराष्ट्र चॅप्टरचे अध्यक्ष डॉ. उमेश कानडे, उपाध्यक्ष डॉ. राजीव राव, सचिव डॉ. चंद्रशेखर भाले, कुलगुरू डॉ. राकेश कुमार शर्मा, कुलसचिव डॉ. व्ही. व्ही. भोसले, मेडिकल कॉलेजचे अधिष्ठाता डॉ. राजेश ख्यालप्पा, वैद्यकीय अधीक्षक डॉ. वैशाली गायकवाड, उपकुलसचिव संजय जाधव यांच्यासह मान्यवर उपस्थित राहणार आहेत. या परिषदेत महाराष्ट्रासह देशभरातून ६०० हून अधिक तज्ज्ञ डॉक्टर, संशोधक, आणि पदव्युत्तर विद्यार्थी सहभागी होणार आहेत.
परिषदेत देश-विदेशातील नामवंत तज्ज्ञ, ख्यातनाम पॅथॉलॉजिस्ट आणि विषयतज्ज्ञांची मार्गदर्शक व्याख्याने व विशेष सत्रे होणार असून प्रगत निदान तंत्रे आणि आधुनिक तंत्रज्ञानाची माहिती व प्रत्यक्ष अनुभव, युवा पॅथॉलॉजिस्टना संशोधन, नवकल्पना आणि शैक्षणिक गुणवत्तेला प्रोत्साहन देण्यासाठी शोधनिबंध व पोस्टर सादरीकरण, पुरस्कार, त्याचबरोबर पॅथॉलॉजी क्षेत्रातील सध्याची आव्हाने, बदलती मार्गदर्शक तत्त्वे आणि भविष्यातील वाटचाल यावर तज्ज्ञांची चर्चा होणार आहे.

*पहिली हरित परिषद*
‘मॅपकॉन’च्या इतिहासात प्रथमच ही परिषद ‘ग्रीन कॉन्फरन्स’ म्हणून आयोजित केली जात आहे. यामध्ये डिजिटल ॲब्स्ट्रॅक्ट बुक, ई-प्रमाणपत्रे, क्युआर कोडद्वारे नोंदणी केली जाणार आहे. प्लास्टिक बाटल्या आणि फ्लेक्स बॅनरचा वापर पूर्णपणे टाळून सीड-पेपर बॅग, ज्यूट बॅगचा वापर केला जाईल. कागद वाचवण्यासाठी डिजिटल पोस्टर सादरीकरण, प्रत्येक नोंदणीसाठी एक वृक्ष लागवड असे उपक्रम राबवले जाणार आहेत. वैद्यकीय परिषदेचा कार्बन फूटप्रिंट कमी करणे आणि भावी पिढीच्या पॅथॉलॉजिस्टमध्ये पर्यावरणपूरक वैद्यकीय प्रॅक्टिसची जाणीव निर्माण करणे हा यामागील प्रमुख उद्देश असल्याचे डॉ. देशमुख यांनी सांगितले.यावेळी संयोजन समितीसह विविध समितींचे प्रमुख व सदस्य उपस्थित होते.

लक्षतीर्थ वसाहत येथील गवळी कुटुंबीयांचा गणेश ठरत आहे अनेक सेलिब्रिटी आणि गवळी कुटुंबियांसाठी महत्वपूर्

लक्षतीर्थ वसाहत येथील गवळी कुटुंबीयांचा गणेश ठरत आहे अनेक सेलिब्रिटी आणि गवळी कुटुंबियांसाठी महत्वपूर्

कोल्हापूर/प्रतिनिधी : अतिशय प्रतिकूल परिस्थितीत लक्षतीर्थ वसाहत येथील गवळी कुटुंबीयांनी २० वर्षापूर्वी दोन फुटापासून गणेश मूर्ती बसवण्यास सुरुवात केली. या गणेशाच्या आगमनाने गेल्या २० वर्षात गवळी कुटुंबियांसोबतच वसाहत आणि अनेक सेलिब्रेटींचा उद्घार झाला. त्याच्या दर्शनाने जीवन बदलण्याची भावना अनेकांनी व्यक्त केली. या गणेशाच्या चरणी लिन होण्यासाठी अनेक सेलिब्रेटीं इथे येतात. शनिवारी या मंडळाच्या गणेशाचे मालिकांमधित कलाकार आणि राजकारण्यांच्या उपस्थितीत पारंपारिक पद्धतीने जल्लोषात आगमन झाले. गणेशाच्या दर्शनासाठी लक्षतीर्थ वसाहत लोटली होती.
कोल्हापूरच्या पश्चिम दिशेला पूर्वीचा तोफेचा माळ. शहराचा विस्तार झाला आणि या तोफेच्या माळावर झोपड्या मारून लोकं राहू लागली. याच परिसराला लक्षतीर्थ वसाहत अस देखील म्हटल जात. अतिशय पुण्यभूमी असलेल्या या वसाहतीत झोपडपट्टीमुळ सामाजिक जीवन अस्थिर बनले होते.अत्यंत प्रतिकूल परिस्थितीत आणि शिक्षणाच्या अभावामुळे अनेकजण खून, मारामारी, चोऱ्यामाऱ्याकडे वळले. त्यामुळे समाजात वसाहतीकडे पाहण्याचा दृष्टीकोन बदलला. या परिसराची ओळख गुन्हेगारांची वसाहत अशी बनली. याच परिसरात गवळी कुटुंबियांचं घर. अविनाश आणि मनोज हे दोघेजण कष्ट करून कुटुंब सांभाळत होते. परिस्थितीत नसतानाही त्यांनी दोन फुटी श्री गणेशाच्या मूर्तीची २० वर्षापूर्वी प्रतिष्ठापना केली.
त्यानंतर अविनाश गवळी यांच्या मूर्तीची दरवर्षी उंची वाढत गेली. परिस्थिती बदलण्यासाठी गोवा इथं गेलेला मनोज गवळी यांन तिथं सामाजिक, राजकीय, व्यावसायिक क्षेत्रात आपला जम बसवला. दरम्यान या गणपतीमुळे अनेकांच्या जीवनाच कल्याण झालं, अशी भावना निर्माण झाल्याने,अनेक जण या उत्सवासाठी कोल्हापुरात येऊ लागले. गवळी कुटुंबियांनी चक्क २० फुटी गणेश मूर्ती श्री प्रेमी मंडळात बसवण्यास सुरुवात केली.
नवसाचा श्री गणेश अशी ख्याती झाल्यामुळे नाट्य, मालिका, चित्रपट, राजकीय, सांस्कृतिक क्षेत्रातील अनेक जण या गणेशाच्या दर्शनाला दरवर्षी याठिकाणी येतात. सुवर्णालंकार जडीत या गणेश मूर्तीचे मनोभावे दर्शन घेतात.
यंदा या श्री गणेशाची आगमन मिरवणूक जल्लोषात निघाली. देव माणूस… या मालिकेतील अभिनेत्री वैशाली कल्याणकर आणि अभिनेते किरण गायकवाड तसेच साताऱ्याचे नगरसेवक पंकज चव्हाण, उद्योजक मनोज गवळी, अविनाश गवळी यांच्या हस्ते या गणेशाचे पूजन झाले. त्यानंतर ढोल ताशांच्या गजरात मिरवणूकीला प्रारंभ झाला.
विद्युत झोतात निघालेल्या गणेशाच्या आगमन मिरवणूकीत सहभागी होण्यासह गणेशाचे दर्शन आणि सेलिब्रिटींच्या भेटण्यासाठी अवघी लक्षतीर्थ वसाहत या मिरणूकीकडे लोटली होती.नागरिक आणि गणेश भक्तांनी मनोभावे श्रीं प्रेमींच्या गणेशाचे दर्शन घेतले. सामाजिक अस्वस्थता आणि आर्थिक अस्थिरता असलेल्या या परिसरात या श्रींच्या प्रतिष्ठापनेमुळ तरुण पिढी गैरमार्ग सोडून भक्ती मार्गाकडे वळली आहे.

भारतातील सर्वोच्च न्यूरो संस्था SCTIMST, त्रिवेंद्रम कडून न्यूरोसर्जन डॉ. शिवशंकर मारजक्के यांना सर्वोच्च “अवॉर्ड ऑफ एक्सलन्स” प्रदान

भारतातील सर्वोच्च न्यूरो संस्था SCTIMST, त्रिवेंद्रम कडून न्यूरोसर्जन डॉ. शिवशंकर मारजक्के यांना सर्वोच्च “अवॉर्ड ऑफ एक्सलन्स” प्रदान

श्री चित्रा संस्थेच्या ५० वर्षांच्या इतिहासात (१९७६-२०२६) पहिल्यांदाच | न्यूरोसर्जरीतील नाविन्यपूर्ण शोध आणि उद्योजकीय दूरदृष्टीचा सन्मान

त्रिवेंद्रम/प्रतिनिधी : अत्यंत अभिमानाच्या क्षणी, जागतिक कीर्तीचे न्यूरोसर्जन डॉ. शिवशंकर मारजक्के यांना “अवॉर्ड ऑफ एक्सलनस” या सर्वोच्च पुरस्काराने सन्मानित करण्यात आले आहे. न्यूरोसर्जरी आणि रुग्णसेवेतील अग्रगण्य नाविन्य, उद्योजकीय दृष्टी आणि ट्रान्सलेशनल उत्कृष्टता यासाठी हा पुरस्कार देण्यात आला आहे.हा पुरस्कार त्यांची मातृसंस्था SCTIMST, त्रिवेंद्रम (श्री चित्रा तिरुनल इन्स्टिट्यूट फॉर मेडिकल सायन्सेस अँड टेक्नॉलॉजी – Institute of National Importance) कडून प्रदान करण्यात आला आहे. ही संस्था भारत सरकारच्या विज्ञान आणि तंत्रज्ञान विभागांतर्गत येणारी एकमेव केंद्र सरकारी संस्था आहे आणि हृदय व मेंदूसाठी लागणारी वैद्यकीय उपकरणे स्वदेशातच विकसित करणारी भारतातील एकमेव संस्था आहे – खरा Make in India चा आदर्श.

डॉ. मारजक्के यांची प्रतिक्रिया:

“हा वैयक्तिक सन्मान नाही. हा माझ्या आवड, चिकाटी, सातत्य, जिद्द, रुग्णसेवेतील करुणा, माझ्या संपूर्ण टीम आणि ‘Work is Worship’ या संकल्पनेचा सन्मान आहे. परमपूज्य अदृश्य काडसिद्धेश्वर स्वामीजींचे आशीर्वाद, मार्गदर्शन आणि पाठबळ हेच माझ्या यशाची गुरुकिल्ली आहे. “मला नेहमीच श्री चित्रा सारखी प्रॅक्टिस करायची होती – जागतिक दर्जाची सुविधा, गुंतागुंतीची प्रकरणे, फक्त शुद्ध न्यूरोसर्जरी. कणेरी गावातील सिद्धगिरी हॉस्पिटल येथे 13 वर्षे प्रॅक्टिस केल्यानंतर आज मला वाटते की मी गावातच एक मिनी-श्री चित्रा तयार केली आहे – तिथलीच कार्यसंस्कृती, न्यूरोरेडिओलॉजी रीडिंग, सविस्तर डिस्चार्ज समरी, कडक ICU कंट्रोल आणि न्यूरोपॅथॉलॉजी चर्चा.”

डॉ. शिवशंकर मारजक्के यांच्याविषयी:

दुहेरी सुवर्णपदक विजेते डॉ. मारजक्के हे त्यांच्या अपवादात्मक शस्त्रक्रिया कौशल्य, अचूक निदान आणि रुग्ण-प्रथम दृष्टिकोनासाठी जगभरात ओळखले जातात. त्यांनी जगातील पहिल्या अनेक ब्रेन बायपास शस्त्रक्रिया केल्या आहेत – जी भारतात मोजकेच न्यूरोसर्जन करू शकतात.एका लहानशा गावातील शेतात जन्म, दूध विकून मोठे झाले, हायस्कूलपर्यंत घरात वीजही नव्हती. गेल्या १३ वर्षांपासून ते ग्रामीण भागातील एका धर्मादाय रुग्णालयात सेवा देत आहेत आणि त्याचे रूपांतर त्यांनी आंतरराष्ट्रीय दर्जाच्या प्रगत न्यूरोसर्जरी केंद्रात केले आहे.
त्यांचे जीवनतत्त्व: _”जेव्हा तुम्ही तुमच्या कामाची पूजा करता, तेव्हा ईश्वर तुमच्या हातून काम करून घेतो. आपण फक्त निमित्तमात्र आहोत.”_
हा सन्मान सिद्ध करतो की “उत्कृष्टतेला कोणतेही पोस्टकोड नसते.”

सिद्धगिरीच्या पशुवैद्यक महाविद्यालयाचा लोकार्पण सोहळा पंकज मुंडे यांच्या हस्ते येत्या गुरुवारी होणार

सिद्धगिरीच्या पशुवैद्यक महाविद्यालयाचा लोकार्पण सोहळा पंकज मुंडे यांच्या हस्ते येत्या गुरुवारी होणार

कोल्हापूर/प्रतिनिधी : श्री सिद्धगिरी मठ संस्थान तर्फे स्थापन करण्यात आलेल्या खाजगी पशुवैद्यक महाविद्यालयाच्या उद्घाटनाचा लोकार्पण सोहळा आणि भव्य पशुपालक मेळावा येत्या गुरुवारी दिनांक ३ सप्टेंबर रोजी कणेरी मठ परिसरात आयोजित करण्यात आला आहे. ह्यासाठी राज्याच्या पशुसंवर्धन, पर्यावरण आणि वातावरणीय बदल खात्याच्या मंत्री माननीय नामदार पंकजाताई गोपीनाथ मुंडे यांच्या शुभ हस्ते आयोजित करण्यात आला असल्याची माहिती प पू काडसिद्धेश्वर स्वामीजी यांनी दिली.
कणेरीच्या सिद्धगिरी अध्यात्म संस्थानातर्फे धार्मिक, सामाजिक, कृषी, आरोग्य, शिक्षण, आपत्ती निवारण, ग्रामविकास आधारित उपक्रमेम राबवली जातात, याचाच महत्त्वाचा टप्पा देशी गोवंशाच्या समृद्ध विकासासाठी पशुवैद्यकीय उपचार सेवेच्या माध्यमातून आणि पदवी शिक्षणाच्या अभ्यासक्रमातून करण्यासाठी “श्री सिद्धगिरी पशुवैद्यकीय विज्ञान महाविद्यालयाची ” स्थापना करण्यात आली आहे. भारतीय पशुचिकित्सा परिषदेच्या सर्व कायदेशीर अटी आणि शर्तींची पूर्तता करून महाराष्ट्र पशु आणि मत्स्य विज्ञान विद्यापीठ नागपूरच्या शिफारसीनुसार या महाविद्यालयाची मुहूर्तमेढ रचली आहे.
येत्या गुरुवारी दिनांक ३ सप्टेंबर रोजी राज्याच्या पशुसंवर्धन मंत्री माननीय नामदार पंकजाताई मुंडे यांच्या शुभ हस्ते आणि सातारा जिल्हा परिषदेच्या अध्यक्ष प्रियाताई महेश शिंदे, विधानसभेचे सदस्य आमदार अमल महाडिक, उत्तर प्रदेशच्या पंडित दीनदयाल उपाध्य पशुचिकित्सा विश्वविद्यालयाचे माजी कुलगुरू डॉ. कृष्ण मुरारीलाल पाठक, क्रांतिसिंह नाना पाटील पशुवैद्यक महाविद्यालयाचे संयोगी अधिष्ठाता डॉ. विकास वासकर, गोकुळचे प्रशासकीय सदस्य डॉ. चंद्रकांत परूळेकर, चितळे उद्योग समूहाचे संचालक विश्वास चितळे आणि जिल्हा उपायुक्त पशुसंवर्धन आणि दुग्ध व्यवसाय कोल्हापूर डॉ. प्रमोद बाबर यांच्या प्रमुख उपस्थितीत संपन्न होणार आहे.
महाविद्यालयाच्या बोधचिन्हांचे प्रकाशन आणि पशु सर्व चिकित्सालयाच्या उपचार सेवा विस्तारीकरणासाठी गोकुळ दूध संघाशी सामंजस्य करार संपन्न होणार असल्याची माहिती महाविद्यालयाचे प्राचार्य डॉ. ए. मुरुगप्पा यांनी दिली. तसेच कृषी विज्ञान केंद्रातर्फे पशुपालक मेळाव्यासाठी उपस्थित होणाऱ्या दूध उत्पादकांना देशी गोवंश प्रदर्शन आणि गोवंश चलीत कृषी यंत्रांचे प्रात्यक्षिक आयोजित करण्यात आले असल्याचे प्राचार्य डॉ. रवींद्र सिंग यांनी कळवले आहे. या संस्थांनचे कार्यकारी संचालक डॉ. यशोवर्धन बारामतीकर, मुख्य कार्यकारी अधिकारी जी पी वड्ड, श्री विक्रम पाटील व श्री प्रल्हाद जाधव यांच्यासह संस्थांच्या सर्व संचालक मंडळाकडून आणि नियोजनाची तयारी सुरू आहे.
या निमित्याने श्री सिद्धगिरी पशुवैद्यकीय विज्ञान महाविद्यालय विज्ञान केंद्राच्या संयुक्त विद्यमाने गोकुळचे कार्यकारी संचालक डॉ. योगेश गोडबोले, चितळे डेअरी चे संचालक गिरीश चितळे यांच्या मार्गदर्शनात भव्य पशुपालक मेळावा आयोजित करण्यात आला असून समृद्ध पशुपालन आणि सक्षम दूध व्यवसायासाठी डॉ. सुनील राऊतमारे, डॉ. नितीन मार्कंडेय, डॉ. अंकुश परिहार, डॉ. प्रशांत योगी, डॉ. दिनेश टाकळीकर, डॉ. विनोद पाटील, पांडुरंग काळे, डॉ. पुष्पनाथ चौगुले, डॉ. कैवल्य देशमुख, डॉ. राऊ भांगे या तज्ञांकडून उपस्थितांना मार्गदर्शन होणार आहे.

Latest Updates

Most Views

Top Stories

Editor's Choice

Advertisements

Grid Posts

Thumbnail

Tile List

Tile Posts

List Posts

Grid Posts

Thumbnail

Tile Posts

Grid Posts

List Posts

Recent Posts