फायर फीविषयी सकारात्मक मार्ग काढू -महापालिका प्रशासक कादंबरी बलकवडे
कोल्हापूर/प्रतिनिधी : सराफ व्यावसायिकांना लागू करण्यात आलेल्या फायर फीविषयी सकारात्मक मार्ग काढू, असे आश्वासन महापालिका प्रशासक डॉ. कादंबरी बलकवडे यांनी आज सराफ संघाच्या शिष्टमंडळाला दिले, तर यातून मार्ग निघाला नाही तर आंदोलन करण्याची घोषणा अध्यक्ष कुलदीप गायकवाड यांनी यावेळी केली.
महापालिकेच्या वतीने सर्व व्यापाऱ्यांना नोटीस काढून फायर फी भरण्यास सांगितले आहे, मात्र सर्वच व्यापाऱ्यांना फायर फी भरावी लागणार नाही, हे महापालिकेच्या निदर्शनास आणून वेळोवेळी ही बाब निवेदनाच्या माध्यमातून स्पष्ट केली होती तरीही फायर फी भरण्याचे आवाहन करण्यात आले.
याला अनुसरून कोल्हापूर सराफ व्यापारी संघाच्या शिष्टमंडळाने आज डॉ. बलकवडे यांची भेट घेऊन निवेदन देऊन वस्तुस्थिती समजावून सांगितली. यावेळी डॉ. बलकवडे यांनी प्रशासनाबरोबर बोलून यातून सकारात्मक मार्ग काढण्याचे आश्वासन दिले.
दरम्यान, अध्यक्ष गायकवाड यांनी सांगितले की, निवेदनाच्या माध्यमातून फायर फीविषयी सर्व माहिती प्रशासकांना दिली आहे. यातून जर आम्हाला सूट मिळाली नाही तर नाईलाजाने आंदोलनाचा मार्ग अवलंबावा लागेल. यावेळी सचिव अनिल पोतदार (हुपरीकर), संचालक ललित गांधी, सुहास जाधव, प्रसाद कालेकर आदी उपस्थित होते.
