रविवारचे जोतिबा खेटे नियोजन नको – जिल्हाधिकारी यांचे देवस्थान समितीस सुचना पत्र
कोल्हापूर/प्रतिनिधी : कोरोना विषाणूचा संसर्ग वाढत असल्यामुळे श्री क्षेत्र वाडी रत्नागिरी येथे २८ फेब्रुवारीपासून पुढील चार रविवारी होणारे जोतिबा खेटे आयोजित करण्यात येऊ नयेत . ‘ असे पत्र जिल्हाधिकारी दौलत देसाई यांनी पश्चिम महाराष्ट्र देवस्थान व्यवस्थापन समितीचे अवर सचिव तथा सचिवांना आज पाठविले आहे . मात्र पारंपरिक पध्दतीने धार्मिक विधी करण्यास कमीत कमी मानकरी -पुजारी व भाविक यांच्या उपस्थितीत परवानगी देण्यात येत असल्याचे पत्रात म्हटले आहे . दरवर्षी श्री क्षेत्र वाडीरत्नागिरी येथे होणाऱ्या श्री जोतिबा खेटे कार्यक्रमावेळी भाविकांची -नागरिकांची मोठ्या प्रमाणावर गर्दी मंदिर व परिसरात होत असते . यावर्षी २८ फेब्रुवारी रोजी पासून पुढील चार रविवारी श्री जोतिबा खेटे कार्यक्रमावेळी भाविकांची -नागरिकांची क्षेत्र वाडीरत्नागिरी येथे फार मोठ्या प्रमाणावर गर्दी होण्याची शक्यता नाकारता येत नाही . या पार्श्वभूमीवर जिल्हा प्रशासनाने श्री जोतिबा खेटे आयोजित करु नयेत असे कळवले आहे . श्री जोतिबा खेटे कार्यक्रमास भाविकांना व नागरिकांना प्रवेश देण्यात येवू नये , असे यात म्हटले आहे. कोरोनाच्या वाढत्या प्रसाराच्या पाश्वैभुमीवर ही भुमिका जिल्हा प्रशासनाने घेतला आहे.
