कोल्हापूरचा शाही दसरा भवानी मंडप येथे साधेपणाने साजरा

कोल्हापूर/प्रतिनिधी : दरवर्षी श्री छत्रपती देवस्थान ट्रस्टच्या वतीने विजयादशमी सीमोल्लंघनाच्या कार्यक्रमाचे आयोजन करण्यात येते. पंरतु यावर्षी कोरोनाच्या पार्श्वभूमीवर हा सोहळा दरवर्षी इतक्या भव्य प्रमाणात साजरा न करण्याचा निर्णय करवीर अधिपती श्रीमंत शाहू छत्रपती महाराजांनी घेतला होता. त्यामुळे परंपरा खंडीत न करता जुन्या राजवाड्यातील अंबा चौकात सोनं लुटण्याचा पारंपरिक कार्यक्रम पार पडला.यावेळी कोल्हापूर अधिपती श्रीमंत शाहू छत्रपती महाराज, श्रीमंत युवराज संभाजीराजे छत्रपती, श्रीमंत महाराजकुमार मालोजीराजे छत्रपती, श्रीमंत युवराजकुमार शहाजीराजे छत्रपती, श्रीमंत राजकुमार यशराजे छत्रपती यांच्या हस्ते शमीपूजन करण्यात आले.

ग्रामविकास मंत्री हसन मुश्रीफ यांच्या पाठपुराव्याने अखेर हसूर बुद्रुक ते बोळावी रस्ता डांबरीकरणाचा प्रश्न संपला

मुरगुड/प्रतिनिधी : ग्रामविकास मंत्री हसन मुश्रीफ यांच्या पाठपुराव्याने अखेर हसूर बुद्रुक ते बोळावी या वनविभागाच्या हद्दीतून जाणाऱ्या रस्त्याच्या डांबरीकरणाचा प्रश्न मिटला आहे. वन विभागाने हा रस्ता खडीकरणासह, रुंदीकरण व डांबरीकरण करण्यास परवानगी दिली आहे. याबाबतचे परिपत्रक मंत्री श्री. मुश्रीफ यांनी सार्वजनिक बांधकाम विभागाचे उपअभियंता डी. व्ही. शिंदे यांच्याकडे दिले.
याबाबत अधिक माहिती अशी, कागल तालुक्यासह गडहिग्लज, भुदरगड व आजरा या तालुक्यातील वाहतुकीच्यादृष्टीने हसूर बुद्रुक, बोळावी, ठाणेवाडी, अवचितवाडी, चिमगाव  ते मुरगूडपर्यंत हा रस्ता अत्यंत महत्वाचा आहे. भुदरगड तालुक्यातील पांगिरे पाटीपासून सुरू झालेला हा रोड पुढे मुरगूडला संपतो. दरम्यान; हसूर बुद्रुक ते बोळावी या दोन गावांना जोडणाऱ्या रस्त्यांपैकी साधारणता एक किलोमिटर लांबीचा रस्ता वनविभागाच्या हद्दीत आहे. वन विभागाच्या कायद्यामुळे हा रस्ता करता येत नव्हता. प्रत्यक्षात रस्ता असतानाही त्यावर खडीकरण किंवा डांबरीकरण करण्यासाठी कायद्याने बंदी होती.
खडी उखडल्यामुळे गेल्या अनेक वर्षांपासून हा रस्ता उद्ध्वस्त झालेल्या अवस्थेत होता. त्यामुळे अनेक अपघात होत होते. अनेक वेळा ग्रामस्थ आणि वनविभागाचे अधिकारी यांच्यामध्ये संघर्ष सुद्धा झाले आहेत. वनविभागाच्या उच्चस्तरीय समितीच्या मान्यतेशिवाय हा रस्ता करता येत नव्हता.

चौकट,
अनेक वर्षापासूनचा प्रश्न संपला याबाबत बोलताना ग्रामविकास मंत्री हसन मुश्रीफ म्हणाले, गेल्या अनेक वर्षांपासून वन विभागाने रस्ता करण्यासाठी मंजुरी द्यावी, म्हणून मी प्रयत्न करीत होतो. वन विभागाचे मुख्य कार्यालय असलेले भोपाळ, नागपूर आणि मुंबई असा दीर्घकालीन प्रवास करून आत्ता ही मान्यता मिळालेली आहे. हा रस्ता शॉर्टकट असल्यामुळे लोक या मार्गानेच जाणे पसंत करतात. आत्ता पाऊसही संपत आलेला आहे, त्यामुळे लवकरात लवकर या रस्त्याचे खडीकरण, रुंदीकरणासह डांबरीकरण सुरू करून हा रस्ता सुसज्ज बनवण्याचा माझा प्रयत्न राहील. त्याप्रमाणे निधी उपलब्ध करून देण्यात येईल. या भागातील लोकांचा गेल्या अनेक वर्षांचा प्रश्न सुटलेला आहे, याचा मला मनापासून आनंद आहे.

कोल्हापूरच्या के. एम. टी. च्या चाकांना गती देणारे मेकॅनिकल चंदू मेस्त्री परिवहन समिती
(के.एम.टी.) च्या सभापतीपदी,कोल्हापूरचा अभिमान वाढला

कोल्हापूर/प्रतिनिधी : कोल्हापूरच्या स्क्रॅप झालेल्या के.एम. टी दुरुस्त करून प्रवाशांसाठी उपलब्ध करून दिलेल्या मेकॅनिकल चंदू मेस्त्री यांनी कोल्हापूरच्या के.एम. टी परिवहन समिती सभापती पदी काम करण्याची संधी मिळाली आहे.त्यांनी केलेल्या कार्यामुळेच त्यांना ही संधी मिळाली आहे असे म्हंटले तरी वावगे होणार नाही अशा निर्णयामुळे कोल्हापूरचा अभिमान आणखी वाढला आहे.
साधारण २००३ चे साल असावे, कोल्हापूर महानगरपालिकेच्या के.एम.टी.विभागाची परिस्थिती अतिशय बिकट होती, यावेळी सुनिल मोदी हे या परिवहन समितीचे सभापती होते. त्यांनी पूर्ण व्यापारी धोरण अवलंबून के.एम.टी. ला उर्जित अवस्था आणण्याचा प्रयत्न केला. तो यशस्वीही झाला. नविन बस खरेदी करण्यासाठी
निधी नव्हता. वर्कशॉपमध्ये सुमारे ५०हून अधिक बसगाडया बंद अवस्थेत होत्या.
अशावेळी सभापती सुनिल मोदीनी कार्यकर्ते असणाऱ्या ट्रक मेकॅनिकल चंद्रकांत
सुर्यवंशीची (चंदू मेस्त्री) मदत घेतली. बंद असलेल्या बसमधून स्वत: चंदूमेस्त्रींनी
महापालिका वर्कशॉप मधील कर्मचाऱ्यांच्या मदतीने हातात हत्यारे घेऊन बंद म्हणजे
स्कॅप करायच्या बसगाडया रिपेअरी केल्या आणि रस्त्यावर आणून प्रवाशी वहातुकीला
चालू केल्या आणि केएमटी प्रशासनाला उर्जित अवस्थेत आणण्याच्या कामात मोलाची
मदत केली.
आजही ते आपल्या स्कूटरवरुन रस्त्याने जात असतील आणि रस्त्यावर धावणाऱ्या के.एम.टी. बसमध्ये काही बिघाड दिसत असेल तर ते बस थांबवून सांगतात आरे जॉईंटची नट लूज झालेत गाडीत पाना असेल तर ड्रायव्हरला ती नट टाईट करुन दयायला स्वत: मदत करतात, गाडीच्या आवाजामध्ये फरक दिसल्यास ड्रायव्हरला सांगतात अरे रेडीएटरमध्ये पाणी कमी आहे अगोदर पाणी घाल एखादया बसमध्ये
गियर टाकताना आवाज आला तर रस्त्यातच थांबवून सांगतात आरे तुला कोणी लायसन दिलय पूर्ण क्लच दाबून गियर टाकायचा असतो, गियर मोडतोस काय आधीच के.एम.टी. अडचणीत आहे असे समजावणारा हा जेष्ठ अनुभवी ट्रक मेकॅनिकल आजही
पांजरपोळ औद्योगिक वसाहतीत मुलाच्या सोबतीन ट्रक रिपेअरीचा व्यवसाय करतोस.
शिवाजी पेठेतील सामान्य शेतकरी कुटुंबातील हे तत्कालीन शेतकरी कामगार पक्षाच्या पुरोगामी विचारात वाढलेले आपला कामधंदा सांभाळून पांजरपोळ औद्योगिक वसाहतीचा विद्यमान अध्यक्ष राष्ट्रवादी काँग्रेसचा
कार्यकर्ता म्हणून शहरात कार्यरत आहे. यांच्या या के.एम.टी. ला मदत करण्याऱ्या
कार्याची दखल घेवून राष्ट्रवादी काँग्रेसने त्यांची महापालिका परिवहन समितीवर स्विकृत सदस्य म्हणून निवड केली. परिवहन विभागालाही चंदू मेस्त्रींच्या अनुभवाचा मदतीचा फायदाच होतोय.
राज्य नियोजन मंडळाचे अध्यक्ष मा. राजेश क्षीरसागर यांनी अशा कार्यकर्त्याचा
सन्मान झालाच पाहिजे हा विचार घेऊन, पालकमंत्री नाम, सतेज पाटील, ग्रामविकास
मंत्री, नाम, हसन मुश्रीफ यांच्या सहकार्याने चंदू मेस्त्रीना परिवहन समिती सभापती पदाचा सन्मान दयायचा निश्चय केला त्याला महापालिकेतील सत्तारुढ गटाबरोबरच
विरोधी आघाडीनेही एक के.एम.टी. ला आपल मानून सदैव सहकार्य करणाऱ्या मेकॅनिकल कार्यकर्त्यांचा सन्मान करायला दिलदार मनान मदत करुन कार्यकर्त्यांच्या बिनविरोध निवडीस सहकार्य दिले.
या पदावर  आल्यावर लोक काम करतात इथ मात्र वेगळच चित्र दिसतय पदावर
नसताना के.एम.टी. ची सेवा आणि नंतर केलेल्या कामाचा सन्मान म्हणून पद हे वेगळेच समीकरण पहायला मिळतय या निमित्तान एक मात्र ठळक होतय की बऱ्याच संस्थात तज्ञ सदस्य किंवा संचालकांची त्या संस्थेस मदत व्हावी म्हणून निवड केली जाते. पण आज तज्ञ म्हणून काहीच अनुभव नाही केवळ राजकीय सोय म्हणून
कोणाच्याही नियुक्त्या केल्या जातात पण याला चंदूमेस्त्री निश्चितच अपवाद आहेत.
खऱ्या अर्थाने अशाच तज्ञ लोकांची कायदयानुसार निवड होण गरजेचे आहे. असो
सामाजिक चळवळीत काम करणाऱ्या सामान्य मेकॅनिकल चंद्रकांत सुर्यवंशी यांचा सभापतीपदी सन्मान होतोय ही सामान्य माणसास निश्चितच आनंद देणारी घटना आहे.कोल्हापूर शहर व जिल्हा नागरी कृती समिती समस्त कार्यकर्ते यांनी चंदू मेस्त्री याचे अभिनंदन केले असून सर्वच स्तरातून त्यांचे अभिनंदन केले जात आहे.पहिला निवड आणि नंतर काम हे या निवडीमुळे समीकरण बदलले आहे चंदू मेस्त्री यांनी आधी काम आणि आता त्यांची निवड झाली हे केवळ कोल्हापूरमध्येच घडू शकते.

शिक्षक समितीची सामाजिक बांधिलकीची जाणीव कौतुकास्पद- आयुक्त डॉ. कादंबरी बलकवडे

शिक्षक समितीच्या वतीने हॉस्पिटलला मदत वाटप

कोल्हापूर/प्रतिनिधी :  महाराष्ट्र राज्य प्राथमिक शिक्षक समितीने सामाजिक बांधिलकी ठेवून दिलेली मदत अभिनंदनीय असल्याचे मत महानगरपालिकेच्या नूतन आयुक्त डॉक्टर कादंबरी बलकवडे यांनी व्यक्त केले .
शिक्षक समितीच्या वतीने मदत निधी वाटप समारंभात केले .
यावेळी अध्यक्षस्थानी महापौर नीलोफर आजरेकर होत्या . आयुक्त पुढे म्हणाल्या `या कोवीड महामारीच्या काळात शिक्षकांनी स्वतः विविध कामे करून सर्व ठिकाणी प्रशासनास सहकार्य केले आहेच त्याच बरोबर आर्थिक योगदानही महाराष्ट्र राज्य प्राथमिक शिक्षक समितीने दिलेला आहे .ही बाब कौतुकास्पद असून आदर्शवत असल्याचे सांगितले .त्याचबरोबर शिक्षकांच्या शैक्षणिक व सामाजिक कार्याची जाणीव आपल्याला असून यापुढे शिक्षकांनी हा आपला वसा नेटाने चालवावा असे आव्हान केले .तसेच शिक्षकांच्या पाठीशी असल्याचे सांगितले .
यावेळी महापौर निलोफर आजरेकर यांनी शिक्षक समिती ही सातत्याने विद्यार्थी, शिक्षक व समाजाच्या भल्यासाठी काम करत असते आणि त्यांनी पंचगंगा हॉस्पिटल व आयसोलेशन कोविड केअर सेंटरला मदत केल्याबद्दल धन्यवाद दिले . यावेळी महाराष्ट्र राज्य प्राथमिक शिक्षक समितीच्या वतीने पंचगंगा हॉस्पिटल ,आयसोलेशन कोविड केअर सेंटर तसेच पंचगंगा स्मशानभूमी यांना दीड लाखाहून अधिक रुपयांची औषधे व साहित्य दिले . यावेळी उपायुक्त माननीय निखील मोरे ,महिला व बालकल्याण सभापती शोभा कवाळे उपस्थित होत्या .
यावेळी प्रशासन अधिकारी शंकर यादव शिक्षक समितीचे राज्य प्रमुख सुधाकर सावंत यांनी मनोगते व्यक्त केली. राज्य उपाध्यक्ष उमेश देसाई यांनी शिक्षक समिती विद्यार्थी, शिक्षक व समाजाच्या भल्यासाठी राबवत असलेल्या उपक्रमाची माहिती दिली . यावेळी पंचगंगा हॉस्पिटलच्या वतीने गरोदर मातांना विविध शासकीय योजनांची माहिती असलेली फाईल तयार करण्यात आली . त्याचे उद्घाटन यावेळी मान्यवर पाहुण्यांच्या हस्ते करण्यात आले .ही फाईल गरोदर मातांना अत्यंत उपयुक्त अशी माहिती देणारी ठरणार आहे .
या कार्यक्रमाचे स्वागत व प्रस्ताविक सुधाकर सावंत यांनी केले .सूत्रसंचालन डॉ .स्वाती खाडे -पाटील यांनी केले .आभार शहराध्यक्ष संजय पाटील यांनी मानले .
यावेळी मेडिकल ऑफिसर डॉक्टर रमेश जाधव ,पंचगंगा हॉस्पिटलच्या मेडिकल ऑफिसर डॉक्टर विद्या काळे ,नयना बडकस, आशालता कांजर, शैक्षणिक पर्यवेक्षिका उषा सरदेसाई ,प्रकाश पाटील, संजय कडगांवे,तानाजी पाटील, वसंत आडके, सुभाष धादवड,सुनील पाटील ,उत्तम कुंभार, मजीद नदाफ ,संतोष कदम ,मनोहर शिंदे, विठ्ठल दुर्गुळे, मनोज सौरभ, योगेश व्हटकर, मंगेश चव्हाण,फारुख डबीर ,शकील भेंडवडे, जलील शेख ,अनिल बचाटे,नियाज नदाफ ,हनीफ नाकाडे, अधिक कार्यकर्ते उपस्थित होते त्याचबरोबर पंचगंगा हॉस्पिटलचा स्टाफ यावेळी उपस्थित होता .

कळे कळं‌‌‌‌‌बे येथे अपघात तीन ठार चार जखमी

कोल्हापूर/प्रतिनिधी : कळे कळं‌‌‌‌‌बे येथे अपघात तीन ठार चार जण जखमी झाले आहेत.यामध्ये करण दिपक माळवे. वय २७.
संजय दिनकर माळवे. वय ४४.
आक्काताई दिनकर माळवे. वय ६५.
जागेवर ठार झाले आहेत.
गाडीत एकूण सात प्रवासी प्रवास करत होते त्यांच्या कारची एसटीला धडक झाली. सदर कुटुंब विक्रमनगर कोल्हापूर येथील आहे.
माळवे कुटुंबीय हे कळे येथील आपल्या नातेवाईकाच्या अंत्ययात्रेसाठी चालले होते त्या दरम्यान आज शुक्रवारी सकाळी साडेनऊ वाजता कणकवली डेपो एसटी गाडी व मारुती कार मारुती कार MH 09 BW 4141 यांची समोरासमोर धडक झाली. यामधील जखमी चार व्यक्ती सीपीआरमध्ये दाखल करण्यात आले आहेत.

करवीर निवासिनी श्री अंबाबाई (महालक्ष्मी) देवीची सातव्या दिवशी श्री सरस्वती देवी रुपात अलंकार पूजा

कोल्हापूर/प्रतिनिधी : आज अश्विन शुद्ध सप्तमी शके १९४२ शार्वरी नाम संवत्सर शुक्रवार २३ऑक्टोबर २०२० करवीर निवासिनी श्री अंबाबाई (महालक्ष्मी) देवीची श्री सरस्वती देवी रुपात अलंकार पूजा बांधण्यात आली होती.
अश्विन शुद्ध सप्तमी शुक्रवारी आजच्या दिवशी करवीर निवासिनी श्री महालक्ष्मी अर्थात आई अंबाबाई अगस्ती कलोपामुद्रा यांनी केलेली स्तुती ऐकणाऱ्या महासरस्वतीच्या रूपात सजली आहे. आपणा सर्वांना माहीत आहे की करवीर निवासिनीच हे मंदिर त्रिकूट प्रासाद म्हणून ओळखलं जातं हे मंदिर फक्त एकट्या महालक्ष्मीचे नसुन महाकाली आणि महासरस्वती या तिघींच आहे.
तिघींचे तीन स्वतंत्र मंडप गाभारा आणि प्रदक्षिणा युक्त मंदिर आहे. आज या मंदिरात दक्षिणाभिमुख महाकाली ची विराजमान मूर्ती ही चतुर्भुज महिषासुरमर्दिनी रुपात आहे जी करवीरची शक्तीपीठ देवता आहे महाष्टमीचा होम हिच्यासमोरच संपन्न होतो. तर महासरस्वती ची मूर्ती ही चतुर्भुज आणि बैठी असून अभय अंकुश पाश वरद अशी आयुधे व मुद्रा धारण करते.
या तिघींचेही दर्शन महर्षि अगस्तींनी घेतले होते करवीरच्या क्षेत्र स्वामिनीबरोबरच तिच्या या दोन प्रधान प्रकृतींचेही आपण यथासांग पूजन करून त्यांची कृपा प्राप्त करू हिच अपेक्षा
असा या पूजेचा अर्थ आहे.

विश्वविक्रमवीर डाॅ. अथर्व गोंधळी युवा स्टेट अवॉर्ड २०२० या पुरस्काराने सन्मानित

कोल्हापूर/प्रतिनिधी : विश्वविक्रमवीर डाॅ. अथर्व संदीप गोंधळी वय चौदा वर्षे   यास  बहूजनरत्न रामदास आठवले प्रतिष्ठान महाराष्ट्र राज्य यांचे वतीने देण्यात येणारा युवा स्टेट अवॉर्ड २०२० या पुरस्काराने प्रसाद संकपाळ,प्रा. गिरी,  निरंजन तिवारी, महेश शिर्के अनिल माळवी, पीआय विजय साळूंखे डीवायएसपी स्वाती गायकवाड साळूंखे या सर्वांच्या उपस्थितीत सन्मानित  करण्यात आले.यावेळी अथर्वची आई डॉ.सौ.मनीषा संदीप गोंधळी यांनाही आदर्श माता पुरस्काराने सन्मानित करण्यात आले.
टोप संभापुर ता हातकणंगले जिल्हा कोल्हापूर येथील विश्वविक्रमवीर डॉ.अथर्वने वयाच्या १४ व्या वर्षी ३० नोव्हेंबर २०१९ रोजी बारा तासात २९६ किलोमीटर अंतर सायकलिंग मध्ये पूर्ण करून कोल्हापूरमध्ये विश्वविक्रम केला होता.
डॉ अथर्व हा लहानपणापासून विविध खेळांमध्ये राष्ट्रीय व आंतरराष्ट्रीय यश मिळवत आला आहे.२०१९ मध्ये तायक्वांनदो,कुडो,सायकलिंग, ट्रायलिथॉन अशा विविध खेळांमध्ये त्यांने पारितोषिके पटकावली आहेत.सध्याही तो विविध खेळांमध्ये अग्रेसर आहे.सायकलिंगमध्ये त्याने केलेल्या विश्वविक्रमाची नोंद ही
ग्लोबल रेकॉर्ड, चिर्ल्डन वर्ल्ड ऑफ रेकॉर्ड,एशिया पॅसिफिक रेकॉर्ड आणि नॅशनल रेकॉर्ड असे एकूण ११ विक्रमांमध्ये झाली आहे.याचीच दखल ही
द डायसेस ऑफ एशिया इन इंडिया चेन्नई तामिळनाडू यांनी घेऊन त्याला डॉकटरेट इन एथलेटिक ही पदवी बहाल केली होती.
शिवाय केंद्रीय सामाजिक न्यायमंत्री माननीय रामदासजी आठवले यांच्या २५ डिसेंबर या वाढदिवसाचे औचित्य साधून कराड येथे संघर्ष दिन साजरा करण्यात आला होता यावेळी बहुजन रत्न रामदास आठवले प्रतिष्ठान महाराष्ट्र यांच्या वतीने राष्ट्रीय आंतरराष्ट्रीय स्तरावर आपल्या संघर्षमय कर्तुत्वाने उल्लेखनीय कार्य करणाऱ्या खेळाडूंना बेस्ट २०१९ पुरस्कार देऊन गौरविण्यात आले.
यामध्येही विश्वविक्रमवीर डॉ अथर्व गोंधळी याला बेस्ट अँथलेट ऑफ द इयर २०१९ या पुरस्काराने गौरविण्यात आले होते.
डॉ.अथर्वला होली मदर स्कूलच्या प्रिन्सिपल सौ.अनुराधा पाटील,शीतल पाटील,कोरगावकर ट्रस्टचे अमोल कोरगावकर,आकाश कोरगावकर, वडील डॉ.संदीप गोंधळी,आई डॉ.सौ.मनीषा गोंधळी,अनिल माळवी,पत्रकार श्रद्धा जोगळेकर यांचे सहकार्य लाभले.

निवासिनी आई अंबाबाई ची सहाव्या दिवशी करवीर काशी ‘विश्वेश्वरांना दर्शन’ स्वरूपात पूजा

कोल्हापूर/प्रतिनिधी : अश्विन शुद्ध षष्ठीला आज सहाव्या दिवशी करवीर निवासिनी महालक्ष्मी आई अंबाबा ईची शारदीय नवरात्रौत्सवाचा सहावा दिवस. आज करवीर निवासिनी श्री महालक्ष्मी अर्थात अंबाबाई ची करवीर काशी ‘विश्वेश्वरांना दर्शन’ स्वरूपात पूजा अलंकार पूजा साकारली आहे. ती भगवान शंकर काशी सोडून करवीरात निवासाला आले तो प्रसंग सांगणारी . विश्वाच्या निर्मिती नंतर भगवान विष्णूंनी दोन क्षेत्रांची निर्मिती केली एक उत्तरेला काशी दुसरं दक्षिणेला करवीर. उत्तरेची काशी ही मुक्तीदायक ज्ञानपीठ तिचं स्वामित्व भगवान विश्वेश्वराचं तर दक्षिणेचं करवीर म्हणजे मुक्ती बरोबरच भुक्ती म्हणजे आयुष्याची सर्व सुखं देणारं महामातृक अर्थात आईचं मोठं शक्तीपीठ. जेव्हा विष्णूंनी या दोन क्षेत्रांची तुलना केली तेव्हा मुक्तीबरोबर भुक्ती देणारं हे क्षेत्र केवळ एका जवाच्या वजनानं श्रेष्ठ ठरलं म्हणून ही जवा आगळी काशी हा महिमा जाणून भगवान विश्वेश्वर आपल्या सर्व परिवारासह करवीरात आले त्यांनी जगदंबेचं दर्शन घेतले आणि त्या प्रसंगी मातेने त्यांना सांगितले की आपण माझ्या उजव्या बाजूला राहून सर्व भक्तांना तारक मंत्र द्या. त्याप्रमाणे आजही भगवान विश्वेश्वर माता अन्नपूर्णा धुंडीराज गणपती आणि काशी कुंडातील गंगेसह घाटी दरवाजा जवळ असलेल्या मंदिरात राहून भक्तांना मुक्ती देतात.असा या पूजेचा अर्थ आहे.

यकृतामध्ये  ट्युमर असलेल्या अडीच वर्षीय लहान मुलावर सह्याद्रि हॉस्पिटलमध्ये यशस्वी उपचार

कोल्हापूर/प्रतिनिधी  : यकृतामध्ये 15 सेंटीमीटर  ट्युमर असलेल्या एका अडीच वर्षीय लहान मुलावर सह्याद्रि हॉस्पिटल येथे यशस्वी उपचार करण्यात आले. एकीकडे संपूर्ण जग कोरोना महामारीविरूध्द लढत असताना दुसरीकडे या लहान मुलाच्या यकृतामध्ये 15 सेमी ट्युमर असल्याचे निदान झाले.त्याच्या आई-वडिलांना हे ऐकल्यावर धक्का बसला होता.आर्थिक परिस्थिती नसल्याने त्यांनी उपचाराची आशा देखील सोडून दिली होती.मात्र तीन महिन्यांनंतर पुढील उपचार घेण्यासाठी सह्याद्रि हॉस्पिटल पुणे येथे आले.

याबाबत माहिती देताना सह्याद्रि हॉस्पिटल्स मधील यकृत प्रत्यारोपण तज्ञ व हेड पेडियाट्रिक हेपॅटोलॉजिस्ट डॉ.स्नेहवर्धन पांडे म्हणाले की,हे कुटुंब माझ्याकडे मार्चच्या उत्तरार्धात लॉकडाऊन सुरू झाल्यानंतर आले होते.त्याच्या आई-वडिलांना आपल्या मुलाची परिस्थिती पाहून धक्का बसला होता आणि उपचाराच्या खर्चासाठी पैसे नसल्याने हतबल झाले होते.मात्र मला खात्री होती की उपचार केल्यास त्यामध्ये चांगले परिणाम दिसू शकतील.फक्त त्यांना परवडत नाही म्हणून लहान मुलावर उपचार होऊ नये हे मला पटत नव्हते.आमच्या येथील सर्व कर्करोग आणि हेपॅटोबिलियरी तज्ञांची मदत घेऊन या मुलाच्या उपचाराची पुढची दिशा आखली गेली.कोणताही वेळ न घालवता आम्ही केमोथेरपी सुरू केली.दुसरीकडे विविध सामाजिक संस्थांकडे जाऊन मदतीसाठी आम्ही धाव घेतली. परिस्थिती चांगली नव्हती,कारण बहुतेक निधी कोरोनाविरूध्दच्या लढ्यासाठी वापरला जात होता.
सह्याद्रि हॉस्पिटलमधील कर्करोगतज्ञ डॉ.तुषार पाटील म्हणाले की,हा ट्युमर उच्च जोखमीचा होता.म्हणून यामध्ये कुठलीही दिरंगाई न करणे महत्त्वाचे होते.त्याच्यावर केमोथेरपीचे उपचार सुरू करण्यात आले आणि प्रत्येक तीन आठवड्याला केमोथेरपीच्या चार सायकल्स देण्यात आल्या.या मुलाने खंबीरपणे उपचाराला सामोरे जात चांगला प्रतिसाद दिला व त्याच्यामध्ये उपचारांचे कुठलेही दुष्परिणाम (साईड इफेक्टस) दिसले नाहीत.यामुळे ट्युमरचा आकार 5 सेमी पर्यंत कमी झाला आणि अल्फा फेटोप्रोटीन या ट्युमर निर्मिती करणार्‍या घटकांचे प्रमाण 35 लाखवरून 6.6 लाखावर आले.उपचार घेणे अजून लांबवले असते तर ट्युमर यकृताबाहेर पसरण्याचा धोका बळावला असता , म्हणून अशा ट्यूमर्स वर वेळेत  उपचार करणे गरजेचे असते .
सह्याद्रि हॉस्पिटलमधील हेपॅटोबिलियरी सर्जरी व प्रत्यारोपण विभागाचे ऑपरेटिंग सर्जन आणि प्रोग्रॅम डायरेक्टर डॉ.बिपिन विभूते म्हणाले की,या कुटुंबाचे कौतुक करावे तितके कमी आहे.कठिण परिस्थितीत देखील 200 किमी प्रवास करून आपल्या मुलावरचे उपचार त्यांनी सुरू ठेवले.या मुलावर हेपॅटेक्टोमी प्रक्रिया (यकृताचा काही भाग काढून टाकणे) करण्यात आली.त्यानंतर ट्युमर असल्याचे कुठलेही लक्षण त्यामध्ये दिसले नाही.ही प्रक्रिया झाल्यानंतर त्याला 5 दिवसांत डिस्चार्ज देण्यात आला.या मुलाच्या उपचारासाठी लिव्ह टू गिव्ह ,  सामाजिक कार्यकर्ते आणि वैद्यकीय क्षेत्रातील लोकांनी सुरू केलेल्या संस्थेने आर्थिक मदत केली.
हॉस्पिटलमधून घरी जाताना उपचारादरम्यान मदत करणार्‍या सर्व डॉक्टर्स आणि कर्मचार्‍यांचे मुलाच्या आई-वडिलांनी आभार मानले.

व्यापाऱ्यांच्या समस्यांचे निराकारण करा- स्थायी समिती सभापती सचिन पाटील

कोल्हापूर/प्रतिनिधी : शहरातील व्यापाऱ्यांकडून थकित स्थानिक संस्था कराच्या वसूलीसाठी व्यापारी असोसिएशन निहाय कॅप्म लावा, व्यापाऱ्यांच्या काही समस्या व शंका असल्यास त्यांचे योग्य पध्दतीने निराकरण करा, अशी सुचना स्थायी समिती सभापती सचिन पाटील यांनी केली.
स्थानिक संस्था कर विभागाच्यावतीने थकित कराबाबत आढावा घेण्यासाठी स्थायी समिती सभापती सचिन पाटील यांच्या अध्यक्षतेखाली स्थायी समिती सभागृहात बैठक संपन्न झाली त्यावेळी ते बोलत होते. बैठकीस गटनेते शारगंधर देशमुख, अतिरिक्त आयुक्त नितीन देसाई, मुख्याधिकारी विलास सांळोखे यांच्यासह शहरातील सर्व व्यापारी असोसिएशन तसेच व्यापारी संघटनाचे पदाधिकारी उपस्थित होते.
महापालिकेचे उत्पन्न वाढविण्याच्या दृष्टीने व्यापाऱ्यानी त्यांच्याकडील स्थानिक संस्था कराची थकीत देय रक्कम भरुन महापालिकेस सहकार्य करावे असे आवाहन करुन सभापती सचिन पाटील म्हणाले, स्थानिक संस्था कराच्या वसूलीसाठी कॅम्प लावून थकीत देय रक्कम वसूल करण्याबरोबरच व्यापाऱ्यांच्या काही अडचणी असतील तर त्या सोडविण्यास प्राधान्य द्यावे. या कॅम्पमध्ये व्यापाऱ्यांनी सर्व कागदपत्रांसह उपस्थित राहून थकीत स्थानिक कराचा प्रश्न सोडवून घ्यावा असे आवाहनही त्यांनी केले.
व्यापाऱ्यांना महापालिकेचे निश्चितपणे सहकार्य – गटनेते शारगंधर देशमुख यांनी सांगितले ते म्हणाले शहरातील व्यापाऱ्यांनी महापालिकेचा स्थानिक संस्था कर लवकरात लवकर भरावा. शासन आदेशानुसार कराची आकारणी आणि वसूली होणे गरजेचे आहे. जर चुकीच्या पध्दतीने कर आकारणी झाली असेल तर त्याबाबत महापालिका सकारात्मक भूमिका घेईल. व्यापाऱ्यांनी या कॅम्पमधून आपली सर्व कागदपत्रे सादर करुन आपल्या शंका समाधान करुन घ्यावे. महापालिका व्यापाऱ्यांना सर्वतोपरी मदत व सहकार्य करेल. तसेच व्यापाऱ्यांनी एकदा आपली कर निश्चिती फायनल करुन घ्यावी. त्यानुसार होणारी देय रक्कम एक रक्कमी भरावी. यामध्ये काही अडचणी असल्यास महापालिका टप्पे ठरवून देईल. सदरचे कर भरल्याने महापालिका आर्थीक अडचणीतून बाहेर पडेल. आपण आपला कर शहराच्या विकासाठीच वापरला जाईल. तसेच यावेळी त्यांनी अभययोजनेची माहिती घेतली.
अतिरिक्त आयुक्त नितीन देसाई म्हणाले शहरातील व्यापाऱ्यांकडून थकित स्थानिक संस्था कराच्या वसूलीसाठी व्यापारी असोसिएशनच्या मदतीने असोसिएशन निहाय कॅप्म लावण्याचे नियोजन केले जाईल. व्यापाऱ्यांनी आपली सर्व कागदपत्रांची कॅम्प दिवशीच पुर्तता केल्यास त्याच दिवशी कर निश्चिती करुन दिले जाईल. शहरातील नोंदणीकृत एकूण व्यापारी तसेच अभययोजनेस सहभाग घेतलेले व्यापारी यांची माहिती दिली.
कोल्हापूर चेंबर ऑफ कॉमर्सचे संजय शेटे म्हणाले महापालिकेचा स्थानिक संस्था कर व्यापारी निश्चितपणे भरतील. याबाबत महापालिका प्रशासनाने विशेष कॅम्प लावावेत. व्यापारी असोसिएशन व्यापाऱ्यांकडून सर्व असेसमेंट राहिले असेल तर ती पूर्ण करुन घेईल. व्यापाऱ्यांनीही आपल्या सर्व कागदपत्रासह कॅम्पमध्ये सहभाग घेऊन शासन नियमांनुसार आपली कर निश्चिती करुन घ्यावी. आणि देय असणारा कर भरावा, याकामी चेंबर ऑफ कॉमर्स निश्चितपणे पुढाकार घेऊन दिवाळीपुर्वी अधिकाधिक कर भरुन महापालिकेला सहकार्य केले जाईल असे ते म्हणाले.
प्रारंभी मुख्याधिकारी विराज सांळोंखे यांनी थकीत स्थानिक संस्था कराची माहिती दिली. तसेच शासन आदेशाचीही माहिती यावेळी दिली.
यावेळी कोल्हापूर चेंबर ऑफ कॉमर्सचे उपाध्यक्ष शिवाजीराव पोवार, मानद सचिन धनंजय दुगे, संचालक राहुल नष्टे, कोल्हापूर कापड व्यापारी संघाचे अध्यक्ष संपत पाटील, कोल्हापूर चेंबर व्यापारी प्रतिनिधी जयंत गोयानी, भावेश भानुशाली, कोल्हापूर सराफ व्यापारी संघाचे अध्यक्ष कुलदीप गायकवाड, कोल्हापूर इंडिस्ट्रिज असोसिएशन प्रदीप व्हरांबळे, किराणा भुसारी व्यापारी असोसिएश चंद्रकांत रोटे यांच्यासह शहरातील सर्व व्यापारी असोसिएशन तसेच व्यापारी संघटनांचे पदाधिकारी उपस्थित होते.