राष्ट्रीय महामार्ग प्राधिकरणाच्या नविन रस्त्याला लागून पाण्याचे उमाळे
कोल्हापूर महानगरपालिकेला गळती काढण्यात पुन्हा अपयश
कोल्हापूर/प्रतिनिधी : गगनबावडा महामार्गावर फुलेवाडी जकात नाका परिसरातील खांडसरी फाटा येथे सध्या राष्ट्रीय महामार्ग प्राधिकरणाचे रस्त्याच्या एका बाजूचे काम सुरू आहे त्यातच नवीन केलेल्या सिमेंट रस्त्याला लागून असलेल्या एका व्होलमधून पाण्याचे उमाळे सुटू लागल्याने रस्त्याच्या केलेल्या कामाबाबत संभ्रावस्था निर्माण झाली आहे.फुलेवाडी जकात नाका येथे गगनबावडा महामार्गावर एक वर्षांपासून कोल्हापूर महानगरपालिकेकडून जलवाहिनीची गळती काढण्याचे काम सुरू होते. हि गळती शोधण्यात पालिकेला अपयश आल्याने पालिका प्रशासनाकडून नवीन जलवाहिनी बसविण्यात आली. ज्या ठिकाणी जलवाहिनी बसविण्यात आली त्या ठिकाणापासून काही अंतरावर खांडसरी नजिक श्लोक हॉटेलच्या समोर राष्ट्रीय महामार्ग प्राधिकरणाने नवीन बनविलेल्या सिमेंट रस्त्याला लागून एका व्होल मधून काही दिवसांपासून पाण्याचे उमाळे सुटू लागले आहेत. यामुळे हे पाणी नेमके कोठून येत आहे असा सवाल परिसरातील नागरिकांना पडला आहे. यामुळे महापालिकेला खरंच गळती काढण्यात यश आले का ? याबद्दल शंका व्यक्त होत आहे यासोबतच महापालिकेकडून फुलेवाडी भगवा चौक परिसरात ११०० एमएमचा ‘स्लुईस व्हॉल्व’ बसविण्यात आला आहे. त्या व्हॉल्व्ह च्या बाजूच्या एका छोट्या पाईप मधून देखील पाण्याचा मोठा कारंजा उडत असल्याने परिसरात चिखलाचे साम्राज्य पसरले आहे. प्रशासनाने गगनबावडा महामार्ग घाई – गडबडीत उरकण्याच्या नादात गळतीकडे कानाडोळा केल्याचे उघड झाले आहे. रस्ता पूर्ण करण्यापेक्षा छिद्रातून येणारे पाणी गळतीचे आहे की आणखी कोणते आहे याचा शोध घेणे पहिले गरजेचे आहे, अन्यथा रस्त्याच्या मध्यावर गळती राहिली तर काँक्रीट रस्ता फोडून पुन्हा नवीन कामाला सुरुवात करावी लागणार आहे. यामुळे राष्ट्रीय महामार्ग प्राधिकरण व महानगरपालिका प्रशासनाचा बोंगळ कारभार पुन्हा एकदा चव्हाट्यावर आला आहे.
खांडसरी फाटा येथे श्लोक हॉटेल समोर राष्ट्रीय महामार्ग प्राधिकरण ने नवीन बनविलेल्या रस्त्याला लागून असलेल्या एका छिद्रातून गेले कित्येक दिवस पाण्याचे उमाळे उमटू लागले आहेत. फुलेवाडी भगवा चौक नजिक जलवाहिनीवर बसविण्यात आलेल्या ‘स्लुईस व्हॉल्व’ च्या बाजूला असलेल्या एका छोट्या पाईप मधून मोठया प्रमाणात कारंजा उडत असल्याचे दिसत आहे.
