माती उत्खननासाठी २५ हजाराची लाच घेताना तलाठी रंगेहाथ ताब्यात
कोल्हापूर/प्रतिनिधी : वीटभट्टीसाठी माती उत्खनन करण्याकरिता रॉयल्टी भरुन परवाना पाहिजे होता. संबंधित व्यक्तीने रितसर परवाना घेण्यासाठी हातकणंगले तालुक्यातील इंगळी येथील तलाठी संतोष सुभाष उपाध्ये यांच्याकडे गेले. तलाठी उपाध्ये यांनी माती उत्खननासंबंधीचा अधिकृत परवाना देण्यासाठी २५ हजार रुपयांची लाच मागितली. लाचेची रक्कम स्वीकारताना मंगळवारी त्याला लाचलुचपत प्रतिबंधक विभागाच्या पथकाने पकडले.
वास्तविक तलाठी उपाध्येने अधिकृत परवाना देण्यासाठी ३० हजार रुपयांची लाच मागितली होती. संबंधित तक्रारदार व उपाध्ये यांच्यामध्ये २५ हजार रुपयांचा तोडगा निघाला. दरम्यानच्या कालावधीत त्या तक्रारदाराने लाचलुचपत प्रतिबंधक विभागांशी संपर्क साधला. त्यांच्याकडे तक्रार नोंदविली. त्या तक्रारीनुसार पथकाने २४ मार्च रोजी पडताळणी केली व
शहानिशा केल्यानंतर लाचलुचपत प्रतिबंधक विभागाच्या पथकाने आज मंगळवारी (ता. ३० मार्च) रोजी इचलकरंजी येथील अप्पर तहसिलदार कार्यालयाबाहेर सकाळी अकरा वाजण्याच्या सुमारास सापळा लावला.यावेळी तक्रारदारांकडून २५ हजार रुपयांची लाच घेताना उपाध्ये याला रंगेहाथ पकडले.
लाचलुचपत प्रतिबंधक विभागाचे पोलिस उपअधीक्षक आदिनाथ बुधवंत, पोलिस निरीक्षक युवराज सरनोबत, पोलिस कर्मचारी सुनील घोसाळकर, कृष्णात पाटील, रुपेश माने आदींच्या पथकाने ही कारवाई केली.
