जनस्वास्थ्य दक्षता समिती व कोल्हापूर जिल्हा मुख्याध्यापक संघ यांच्या वतीने १ ते ६ जानेवारी २०२५ जनस्वास्थ्य अभियान
कोल्हापूर/प्रतिनिधी : आरोग्य, पर्यावरण, व्यसनाधीनता आणि वैज्ञानिक दृष्टिकोन याबाबत विद्यार्थ्यांमध्ये व समाजामध्ये जागृती निर्माण करण्याच्या दृष्टीने जनस्वास्थ्य दक्षता समिती व कोल्हापूर जिल्हा मुख्याध्यापक संघ यांच्या वतीने आणि माध्यमिक शिक्षण विभाग आणि आरोग्य विभाग जिल्हा परिषद कोल्हापूर यांचे सहकार्याने दरवर्षीप्रमाणे दिनांक १ ते ६ जानेवारी २०२५ या कालावधीत नियोजनुसार जनस्वास्थ्य अभियान राबविण्याचे नियोजन केले आहे.
बुधवार दिनांक १ जानेवारी
या दिवसापासून अभियान काळात रोज प्रार्थनेवेळी जनस्वास्थ्य प्रतिज्ञा घेतली जाईल. तसेच या दिवशी विद्यार्थ्यांना आरोग्य व पर्यावरण विषयावर पोस्टर करावयास सांगून ती अभियान काळात शाळेच्या आवारात मांडल्यानंतर शेवटच्या दिवशी मानवी साखळी वेळी वापरली जातील.
गुरुवार दिनांक २ जानेवारी
जवळच्या आरोग्य केंद्रातील वैद्यकीय अधिकारी /आरोग्य कर्मचारी यांच्या मदतीने कुष्ठरोग, क्षयरोग, एड्स, डेंग्यू आदी गंभीर आजाराबाबत घ्यावयाच्या दक्षतेसंबंधी मार्गदर्शन करतील.
शुक्रवार दिनांक ३ जानेवारी
या दिवशी असलेल्या सावित्रीबाई फुले जयंतीनिमित्त किशोरवयीन लैंगिक समस्या व त्यासंबंधी तरुण वयात घ्यावयाची दक्षता याबाबत मार्गदर्शन केले जाईल.
शनिवार दिनांक ४ जानेवारी
या दिवशी शालेय परिसरात स्वच्छता अभियान राबविले जाईल. विशेषतः विद्यार्थ्यांनी आपल्या स्वतःच्या घरी कचऱ्यापासून खत निर्मिती, त्यापासून फळझाडे लागवड, टेरेसवर किंवा उपलब्ध जागेत भाजीपाला लागवड, सांडपाणी पुनर्वापर, सौर ऊर्जेचा वापर, निर्धूर चूल, टाकाऊ अन्न पदार्थांपासून बायोगॅस निर्मिती आणि रेन वॉटर हार्वेस्टिंग याबाबत प्रबोधन केले जाईल. तसेच या दिवशी पर्यावरण पूरक भारतीय सण साजरे करणे, ध्वनी प्रदूषण करणारी डॉल्बी यंत्रणा तसेच फटाके टाळणे, वाहतुकीचे नियम काटेकोरपणे पाळणे याबाबत विद्यार्थ्यांना जाणीव करून दिली जाईल.
सोमवार दिनांक ६ जानेवारी
या दिवशी गुटखा, तंबाखू, धूम्रपान आणि दारू या व्यसनांचे विरोधात सायंकाळी ४ ते ५ या वेळेत आपल्या शाळेजवळील प्रमुख रस्त्यावर वाहतुकीला अडथळा न आणता तयार केलेले पोस्टर्स हातात घेऊन व्यसनविरोधी घोषणा देत मानवी साखळीच्या रूपात उभे राहतील.
जनस्वास्थ्य अभियानातील आदर्श शाळा, आदर्श शिक्षक, पोस्टर स्पर्धेतील विजेते विद्यार्थी व पर्यावरण पूरक आणि व्यसनमुक्तीचे उपक्रम राबवलेली आदर्श गावे यांना सन्मानचिन्हे देण्याचा कार्यक्रम शाहू स्मारक भवन, दसरा चौक कोल्हापूर येथे आयोजित केला जाईल.
कोल्हापूर जिल्ह्यात गेली २४ वर्षे उस्फूर्तपणे राबविले जाणारे हे जनस्वास्थ्य अभियान एक आदर्शवत असे ठरले आहे. विशेषतः अभियान अंतर्गत गुटखा, तंबाखू धूम्रपान आणि दारू यांच्या विरोधात कोल्हापूर जिल्ह्यातील किमान दोन लाख मुले मानवी साखळीच्या रूपात उभे राहतात. हे भारतातील एकमेव उदाहरण असावे.
