शिवाजी विद्यापीठ सेवक संघाचे अध्यक्ष प्रभाकर उर्फ बाबा सावंत यांचं निधन
कोल्हापूर/प्रतिनिधी : शिवाजी विद्यापीठ सेवक संघाचे अध्यक्ष प्रभाकर उर्फ बाबा सावंत यांचं निधन मंगळवारी सकाळी १० वाजता कदमवाडी शिवराज कॉलनी इथल्या त्यांच्या निवासस्थाना पासून निघणार अंत्ययात्रा
शिवाजी विद्यापीठ सेवक संघाचे अध्यक्ष प्रभाकर उर्फ बाबा सावंत यांचं आज अल्पशा आजारानं निधन झालं. मृत्यूसमयी ते ८१ वर्षाचे होते. त्यांच्या निधनामुळं शिक्षण क्षेत्रावर शोककळा पसरलीय. पन्हाळा गगनबावडा तालुक्याचे माजी आमदार आत्माराम सावंत यांचे सुपुत्र शिवाजी विद्यापीठ सेवक संघाचे अध्यक्ष प्रभाकर सावंत यांचं आज दुपारी 3 च्या सुमाराला निधन झालं. ते ८१ वर्षाचे होते. शिवाजी विद्यापीठाच्या स्थापनेत सावंत यांचा मोठा हातभार होता. १९९८ पासून ते शिवाजी विद्यापीठ सेवक संघाच्या अध्यक्ष पदाची जबाबदारी सांभाळत होते. त्यांनी विद्यापीठ कर्मचार्‍यांच्या अनेक प्रश्‍नांना न्याय मिळवून देण्याचं काम केलं. कर्मचार्‍यांचे प्रश्‍न सोडवण्यात हातखंडा असल्यामुळं त्यांनी राज्यभरातील विद्यापीठात आपली वेगळी ओळख निर्माण केली होती. महाराष्ट्र विद्यापीठ कर्मचारी महासंघाचे ते सदस्य होते. मनोयुवा जेष्ठ नागरिक संघटनेचे अध्यक्ष म्हणूनही ते कार्यरत होते. सीपीआरचे आरोग्यदुत बंटी सावंत यांचे ते वडील होते. त्यांच्या पश्‍चात तीन मुले, सुना आणि नातवंडे असा मोठा परिवार आहे. मंगळवारी सकाळी १० वाजता कदमवाडी शिवराज कॉलनी इथल्या त्यांच्या निवासस्थानापासून अंत्ययात्रा काढण्यात येणार आहे.
