गोकुळ दूध संघाची वार्षिक सर्वसाधारण सभा ठरली वादळी ,इतिवृत्त वाचलेच गेले नाही
कोल्हापूर/प्रतिनिधी : गोकुळ दूध संघाची वार्षिक सर्वसाधारण सभा परंपरेप्रमाणे वादळी ठरली. मागील वर्षाच्या सभेचे इतिवृत्त वाचतानाच विरोधकांनी आक्षेप घेतला. जी सभा झालीच नाही त्याचं इतिवृत्त कसलं? असा सवाल केला. तर सत्ताधाऱ्यांनी यानंतर काहीच मिनिटात सभा गुंडाळली.गोकुळ दूध संघाची वार्षिक सर्वसाधारण सभा आज महालक्ष्मी खाद्य कारखान्याच्या आवारात पार पडली. आगामी निवडणुकांच्या पार्श्वभूमीवर ही सभा वादळी होणार हे स्पष्ट होते. सकाळी आठ वाजल्यापासूनच सभासद सभास्थळी दाखल होत होते.दुपारी एक वाजता संचालक मंडळ व्यासपीठावर आल्यानंतर विरोधकांनी गोंधळ घालायला सुरुवात केली. यानंतर विषय वाचन सुरु झाल्यानंतर मागील सभेचे इतिवृत्त वाचण्यात सुरुवात झाली आणि विरोधकांनी गोंधळ घातला. मागील वर्षी सभा झाली नाही त्याचं इतिवृत्त कसलं असा सवाल विरोधकांनी केला.याच गोंधळात सभा घेण्यात आली. संचालक रणजीत पाटील यांनी सर्वांचे आभार मानून सभा संपली असे जाहीर केले. ही सभा गुंडालळी असा आरोप विरोधकांनी केला.तर सभा व्यवस्थित झाली असा दावा सत्ताधाऱ्यांनी केला. सर्व सभासदांच्या प्रश्नांची उत्तरे द्यायची होती. मात्र, विरोधकांच्या गोंधळामुळे हे करता आले नसल्याचे सभेचे अध्यक्ष अरुण नरके यांनी सांगितले. निवडणुकीमुळे सभा वादळी होणार हे निश्चित होते आणि तसे बोलले जात होते आणि घडले ही तसेच.मात्र,यंदा खुर्चा बांधून ठेवल्याने हाणामारी न होता फक्त गोंधळामध्येच ही सभा गुंडाळण्यात आली.
